Asebter amenzawi
Isṛayil teḥbes adaf n usiman ɣer Ɣezza (Iɣlanen Yeddukklen)
ɣEZZA – Tenna-d tnarit n ussemyuddes (maktab tansiq) n tɣawsiwin tilsanin n Tuddsa n Yeɣlanen Yeddukklen, ass n lexmis, dakken aɛawed Isṛayil teḥbes assiweḍ n usiman ɣer ɣezza, yernu d aya ay d-yeglan s weḥbas deg uɛawed n lebni n 1000 n tnezduɣin deg wakal-a.
« Teḥbes Isṛayil aǧaw n usiman deg tesfift n Ɣezza deg tezwara n wayyur », ɣef wakken ay d-tenna tnarit-a n Yeɣlanen Yeddukklen, am wakken ay d-terna dakken « aḥric seg usiman-a yettwaker yagi ».
Aḥbas-a yegla-d s lexṣaṣ d ameqran n usiman deg temnaḍt n Ɣezza, yernu d aya ay yessawḍen ɣer weḥbas n umur ameqran seg yicanṭiyen n uɛawed n lebni n yexxamen ay sdermen Yisṛayiliyen deg wetɛeddi ay tɛeddan ɣef Ɣezza, ɣef wakken ay d-tenna tnarit n Yeɣlanen Yeddukklen i ussemyuddes n tɣawsiwin talsanin.
« Tuddsiwin ay d-yettakfen lemɛawna ḥebsent lemɛawna-nsent s tedrimt i uṣeggem n yexxamen n wugar n 1.370 n twaculin ɣef lǧal n lexṣaṣ (n usiman) d timerniwt tameqrant deg ssuma », ɣef wakken ay d-tenna tnarit-a deg yiwen n welɣu (bayan).
« Nnig waya, tettwawexxer daɣ tukci n yedrimen i 1.550 n twaculin i lemɛawna-nsen i uɛawed n lebni n yexxamen-nsen, yernu aya ɣef lǧal n lexṣaṣ n usiman », ɣef wakken ay d-tenna tnarit-a.
Yessefk ad ikemmel waǧaw n usiman i uɛawed n lebni n ɣezza ay yettwasdermen deg wetɛeddi-nni ay tetɛedda Isṛayil fell-as deg 2014.
