Asebter amenzawi

Tabatent deg tqacuct deg uleqqem n tegẓal

TABATENT – Yenna-d wepṛufisur Hocine Chaouche, iɣef n umeẓlu n ucelleḥ n yedmaren deg wesbiṭar n Mustapha Bacha (Lezzayer), dakken tawilayt n Tbatent attan deg tqacuct deg uleqqem n tegẓal.

Imsujjiyen ilemẓiyen n wesbiṭar n Tbatent ssawḍen ad leqqmen 50 n tegẓal i yimuḍinen ay d-yusan seg wacḥal n twilayin n tmurt, yernu la ssefrayen ad rnun ad gen gar 65 d 70 n temhal (ɛamaliyyat) n uleqqem aseggas-a, ɣef wakken ay d-yenna wepṛufisur Chaouche mi yebda Usarag Agraɣlan n Wewras wis 5 i uleqqem n tegẓal.

Yenna-d daɣ, deg temsalt-a, dakken yal ayyur, ttilint-d gar 5 d 6 n temhal n uleqqem n tegẓal deg wesbiṭar asdawan n Tbatent, yernu yenna-d dakken yessefk ad ttwasbeɣsen yemsujjiyen d tedbelt n wesbiṭar-a akken ad kemmlen aya.

Yenna-d Wepṛufisur Chaouche dakken la yettwali aleqqem n tegẓal yesɛa azekka yelhan, am wakken ay d-yerna dakken imir-a llan 5 n yimeẓla n udawi n tegẓal ay yettgzen timhal n tegẓal, yili deg 1990, Ldzayer tella tesɛa ala sin n yimeẓla ay yettgen aya.

Ma d iɣef n umeẓlu n tesnajya (ṭibb) n tegẓal n wesbiṭar n Tbatent, Aduktur Ahmed Boukaroura, yenna-aɣ-d dakken wid ixeddmen deg umeẓlu-a la ttnadin ad sɛun ugar n ttejṛiba deg uleqqem n tegẓal, yernu « seg Mayu ay d-yetteddun d asawen », ad uɣalent tegẓal zemrent ad d-ttwakksent seg yimuḍinen imṣeddqen yellan deg tegnit n tmettant n wallaɣ.