Asebter amenzawi

Asdukkel n waṭas n teṛmisin tinagdudin d ubeddel n yiẓuyar n tiyaḍ

LEZZAYER TAMANEɣT – 8 n teṛmisin tinagdudin (carikat ɛumumiyya) n twilayt n Lezzayer ay yettwasdukklen deg 4 n teṛmisin, ma d 3 n teṛmisin niḍen beddlen-asent iẓuyar akken ad yettwasselhu ussefrek n uṣerref-nsent n yedrimen, ɣef wakken ay d-yenna yiwen n uṛabul n tesmilt tadamsant d tedrimant n Wegraw Aɣerfan n Twilayt n Lezzayer.

S waya, Taṛmist n Ussefrek n Wulzuz n Ujemmal tettwasdukkel d Teṛmist n Ussefrek n Tneɣras (masalix). Taṛmist n Wesmal d Uḥuddu n Yiri n Yilel tettwasdukkel d Teṛmist n Wuɣus Amdinan n Lezzayer, ɣef leḥsab n uṛabul-a ay d-iqeddem unemhal n tedbelt d weswaḍ n ussefrek d tsenselkimt, Boussoualim Abderrahmane, i wufrinen n wegraw deg temlilit tamagnut n wegraw-a.

Asdukkel-a iḥuza daɣ Adiwan n Uheyyi n Lḥamma (Ḥusin Day) ay yettwasdukklen d Tnegga n Uheyyi d Wesɣiwes Amdinan n Twilayt n Ldzayer. Ma d Ameẓlu n Tallalt Tasnajyant n Tuɛjilin (SAMU anmetti) yettwasdukkel d Tnarit n Tallalt Tanmettit n Lezzayer (Basma).

ɣef leḥsab n uṛabul-a, asdukkel-a ur d-igellu s lateṛ n diri ɣef yixeddamen n teṛmisin-a.

Deg wayen yerzan tiṛmisin umi ttwabeddlen yiẓuyar, tamezwarut d Taṛmist n Ussefrek n Wurti n Termitin n Lḥamma yellan d taṛmist tadeblant, maca ad tuɣal d taṛmist tamgurant-tamsenzut (ṣinaɛiyya-tiǧariyya), ma d tiṛmisin niḍen ad ibeddlen d Netcom d Extranet.