Asebter amenzawi

Amezgun n Wehṛan: « Lɣelṭa » teɛjeb i yemfeṛṛǧen

WEHṚAN – Teɛjeb tmezgunt n « Lɣelṭa » (Tuccḍa) i yemfeṛṛǧen ay d-yusan ad as-nezzhen deg umezgun amnaḍan n « Abdelkader Alloula » n Wehṛan.

Tamellaɣt-a tanmettit (kumidya iǧtimaɛiyya) tɛedda-d ass n ssebt deg tzeqqa yeččuṛen d lɣaci, yernu yettban-d dakken ad d-tawi amecwaṛ d urbiḥ imi imfeṛṛǧen seffqen fell-as acḥal d tikkelt.

Ulac ccek dakken ayen ay iɛejben ugar i medden deg tmezgunt-a d ṛṛuḥ-nnes n taḍsa, am wakken ay d-llan daɣ wuraren n tkuṛigṛafit icebḥen aydeg izeffanen (mumattilin) ceḍḥen ama s uẓawan adzayri, ama s uẓawan anmaḍal.

Tamezgunt-a tḥuza-d asentel n tmeṭṭut ay ixeddmen d lqella n wemsefham gar wergaz d tmeṭṭut-nnes taxeddamt, lḥeṛs n tmeddurt tatrart d tmuɣli tamensayt n tmetti tadzayrit.

Amsudem (caxṣiyya) agejdan, Ɛmeṛ, d aselmad deg tesnawit yernu seg melmi kan ay yezweǧ. Tameṭṭut-nnes tebḍa d texdem akken ad t-tɛawen deg wakud aydeg tameddurt-nsen tewɛeṛ yernu tessutur-d ugar n yedrimen akken ad qablen taswiɛt.

Deg tgara, yeqbel Ɛmeṛ ad texdem tmeṭṭut-nnes, maca dindin kan tger tneggarut-a tamawt dakken yewɛeṛ ad texdem beṛṛa i wexxam yernu ad tebded i wexxam-nnes.

Ameskar n tmezgunt-a d ilemẓi Fahsi Said, ma d imseḍru-nnes d Moulay Meliani yernu d ta ay d tamezgunt-nnes tis snat deffir ma yesseḍra-d yagi « Newwaṛ Ṣṣber » deg 2014 s wemɛawen d Fadela Hachemaoui. Tamezgunt n « Lɣelṭa » iɛawen-it deg-s Abdelhafid Boualem ay yettwassnen daɣ s umecwaṛ-nnes ameṛkanti deg umezgun n yigerdan.