Asebter amenzawi

Lezzayer tefka azal i wemɛawen d tmura n Wegrakal

LEZZAYER TAMANEɣT– Yenna-d umaru amatu n weɣlif n tɣawsiwin n wezɣar, Mass Hassane Rabehi, ass n letniyen deg Lezzayer Tamaneɣt, dakken Lezzayer tefka azal i wemɛawen amnaḍan gar tmura n yilel Agrakal, deg yiwen wemyager d umalal n umaru amatu amenzu n Tdukli i Wegrakal d-yelhan d tneflit n teṛmisin, Mass Claudio Cortese, ɣef wakken ay d-yenna yiwen n welɣu (bayan) n weɣlif.

Mass Rabehi yenna-d daɣ dakken yessefk ad tettwasnefli (tuṭawwar) ticcurka tamatut gar Lezzayer d tmura n temda n Wegrakal i lfayda n tmura n temnaḍt ay la yettmagaren aṭas n wuguren yerzan taɣellist, tadamsa d tmetti, ɣef wakken ay d-yenna welɣu-a.

Iḥettet-d daɣ dakken « tamurt-nneɣ teḍḍef deg ussejhed n wassaɣen n wemɛawen d Tdukli i Wegrakal d Tuddsa n Yeɣlanen Yeddukklen i Tneflit Tamgurant (tanmiya ṣinaɛiyya), ladɣa deg wayen yerzan tanneflit n tzemmar tiɣelnawin deg weḥric n temguri d ussebded n teṛmisin timeẓyanin d tlemmasin deg ukatar n unewweɛ n tdamsa », ɣef wakken ay d-yebder welɣu-a.

Mass Cortese yerza-d d yiwet n tmagla (wafd) aydeg llan yigensasen (mumattilin) n Tdukli i Wegrakal d Tuddsa n Yeɣlanen Yeddukklen i Tneflit Tamgurant, yernu tirzi-nsen n uxeddim ɣef Lezzayer ad d-tili ussan n letniyen d ttlata.

Iswi n terzi-a d assewjed i ussudes, deg Lezzayer, n usarag n weswir unnig n tneflit tamgurant d tmeqqunin deg tmura taɛṛabin. Ad d-yili usarag-a ddaw leɛnaya n Tdukli i Wegrakal d Tuddsa n Yeɣlanen Yeddukklen i Tneflit Tamgurant, ɣef wakken ay d-yebder welɣu-nni.