Asebter amenzawi
Ould Khelifa yessawel d wenmahal n Tefriqt n Wenẓul ɣef wemɛawen asindisan
LEZZAYER TAMANEɣT – Yemmuger uselway n Wegraw Aɣerfan Aɣelnaw, Mohamed Larbi Ould Khelifa, ass n ttlata deg Lezzayer Tamaneɣt, anmahal (safir) n Tefriqt n Wenẓul deg Lezzayer, Denis Thokozani Dlomo, yernu ssukken-d tiṭ deg sin ɣef wamek ad yettwassejhed wemɛawen asindisan gar Lezzayer d Tefriqt n Wenẓul, ladɣa deg wenrar n wemni (barlaman), ɣef wakken ay d-yenna yiwen n welɣu n Wegraw.
Iwekked-d uselway n Wegraw Aɣerfan Aɣelnaw, deg wemyager-a, dakken Lezzayer d Tefriqt n Wenẓul « cerken-tent wazalen ilsanen, menɣir amezruy-nsen aqbur n yimenɣi i lmend n tlelli d tgadda. D nitenti ay d tizeglin (aqṭab) n Tefriqt, ladɣa imi ay sɛant azal d dduṛ akelsuddsan (ǧiyuistratiǧi) d ameqran », ɣef wakken ay d-yenna welɣu-a.
Deg wayen yerzan amɛawen awamni (barlamani), yenna-d Mass Ould Khelifa dakken « yeɛjeb-as uxeddim n tegrawt tawamnit n tammidwa (ṣadaqa) gar Lezzayer d Tefrqit n Wenẓul », am wakken ay d-iger tiɣri i webdad « ɣer yidis n lecɣal iwamniyen i ussemqareb gar yiɣerfan d wesmal n wassaɣen ilsanen gar yeɣlanen ».
« Yella-d wemsefham ɣef unewweɛ n yinurar n wemɛawen asindisan d wesfaydi seg tzemmar timeqranin ay sɛant snat-a n tmura ay la yettkemmilen amciweṛ ɣef temsal timeqranin ay yerzan amenẓaw (qarra), ladɣa imenɣi mgal tremmiɣt (irhab) d ttawilat n webdad ɣer yidis n wezref n weɣref aṣeḥrawi i ugguccelman deg yemyagren iwamniyen ifriqiyen d yegraɣlanen », ɣef wakken ay d-yerna welɣu-nni.
