Asebter amenzawi

Wehṛan: asseḥder i yigezzaren yesseknafen aksum deg tḥuna-nsen

WEHṚAN – Aṭas seg yigezzaren ay yesseknafen aksum deg tḥuna-nsen umi yettunefk usseḥder sɣur Tmehla n Wemsizwer d Watigen, ɣef wakken ay aɣ-d-txebber ass n laṛebɛa Tmehla n Tnezzut n Twilayt n Wehṛan.

« Deffir yiwet n tḥemla meɣɣren n wesḥulfu yettwawehhan i wid terza temsalt, nuzen asseḥder i yigezzaren ay la yettgen ccɣel-a yeffɣen i lqanun akken ad qadren ilugan », ɣef wakken ay d-yenna yiɣef n umeẓlu n weswaḍ (maṣlaḥat al-muraqaba) n tsemras timsenziyin, Nouredine Mokadem, ay d-yernan dakken asseknef n weksum ur yeddi d ṣṣenɛa n ugezzar.

ɣef leḥsab n umasay-a (mas’ul) ay d-yennan dakken simal la trennu tzerreɛ tsemrest-a, asseknef n weksum yessefk ad d-lhunt yid-s tneččiyin ay yesɛan lqanun yeqqnen ɣer-sent yernu sɛant ttesriḥ ay tent-yeǧǧan ad gent aya.

« Lemmer ur ttaɣen awal, ad ttwacaṛɛen ɣef werkaḍ n lqann yernu ad ttwaɛaqben s wemdal uɛḍil n wayyur n tḥuna-nsen d lexḍeyya n gar 20.000 d 200.000 n yidinaṛen », ɣef wakken ay d-yenna.

Deg wayen yerzan assewjed i wayyur n Remḍan deg twilayt n Wehṛan, yenna-d Mass Mokadem dakken ad d-yettwassebded unagraw n wannay (niḍam muraqaba) n ssumat, yernu ad d-yili waya s wefraq n tegrawin n yiɛessasen ad yessefqaden ssumat d ssuq d uheyyi n uṛabul ad yettḍafaren yal ass abeddel n ssumat.