Asebter amenzawi

Yebda weswir afeɣnami n ukabar n Wemsegraw Aɣelnaw Amegday

LEZZAYER TAMANEɣT– Yebda weswir (mu’tamar) afeɣnami n Wemsegraw Aɣelnaw Amegday ass n lexmis taṣebḥit deg Lezzayer Tamaneɣt s weḥdaṛ n 1.600 yemttekkiyen akken ad fernen amaru amatu n ukabar-a ay yeḥkem seg leɛḍil, seg Yunyu yezrin, Mass Ahmed Ouyahia.

Abeddu-a yella-d s weḥdaṛ n uneɣlaf amenzu, Abdelmalek Sellal, imasayen (mas’ulin) d yigensasen (mumattilin) n yidisan isertanen yemgerraden d tmetti taɣarimt.

Mass Ouyahia yuɣal-d ɣef yiɣef n ukabar-a deg Yunyu n 2015 deg wemkan n Mass Abdelkader Bensalah, yernu d netta ay d amazwar amenyaf i wemkan n umaru amatu n Wemsegraw Aɣelnaw Amegday.

D tikkelt tamezwarut deg umezruy n ukabar-a aydeg afran n umaru amatu ad d-yili s usenduq n tefranin yernu s tewriqt n taɣect tuffirt.

Aswir-a afeɣnami ad yeqqim 3 n wussan yernu ad d-yettwafren daɣ deg-s Useqqamu Aɣelnaw n Ukabar.

Ad d-ttwaqeddment daɣ tneɣtusin (qararat) tisertanin, tidamsanin, tinmettiyin d uɣawas (muxaṭṭaṭ) n tigawt i yemttekkiyen akken ad tent-sɛeddin.

Llan-d yagi yeswiren n ukabar-a deg twilayin d temnaḍin deg wayyur n Yebrir akken ad d-swejden i weswir-a, yernu yella-d waya akken ad yettwarẓem wenrar i umur ameqran n yimeɣnasen n ukabar-a akken ad d-ttekkin s tekta-nsen i lmend n weswir-a afeɣnami.