Asebter amenzawi

Tunes: tebda tedwilt tis 34 n useqqamu n yineɣlafen n tɣawsiwin n wezɣar n Lmeɣreb Aɛṛab

TUNES - Tebda tedwilt tis 34 n Useqqamu n Yineɣlafen n Tɣawsiwin n Wezɣar n Tdukli n Lmeɣreb Aɛṛab ass n lexmis deg Tunes, d tin aydeg ad tettekki Lezzayer s uneɣlaf-nnes n tɣawsiwin n Lmeɣreb, Abdelkader Messahel.

Ineɣlafen n tɣawsiwin n wezɣar n Tdukli n Lmeɣreb Aɛṛab ad ssiwlen, deg tedwilt-a, ɣef temsal taɛṛabin, tigraɣlanin d temnaḍanin, d wemɛawen gar Tdukli d tuddisin timnaḍanin d tegraɣlanin.

Ad d-ssukken tiṭ yemttekkiyen ɣef tegnit deg tmura n Ssaḥel d wemɛawen aɣellisan (amni) gar tmura n Tdukli. Ad d-semmin daɣ amaru amatu amaynu n Tdukli n Lmeɣreb Aɛṛab deg wemkan n Mass Lahbib Benyahia.

Yenna-d Mass Messahel deg yiwet n tseɣrut (taṣriḥ) n Tnegga n Yisalan n Lezzayer dakken timliliyin-a d tid aydeg ad d-ttwaqeddmen yernu ad ttwaqeyymen lecɣal ay d-yellan seg wasmi ay d-tennulfa Tdukli n Lmeɣreb Aɛṛab (1989) d dduṛ-nnes deg temnaḍt.

Dɣa iwekked-d, deg temsalt-a, dakken Lezzayer tettwali yessefk uɛawed n tmuɣli deg unagraw d temṣukin (hayakil) n Tdukli n Lmeɣreb Aɛṛab akken ad tezmer ad tqabel icqirrwen imnaḍanen d yegraɣlanen, ladɣa taremmiɣt (irhab), inig yeffɣen i lqanun d ussetti n tehyufin.

Yenna-d daɣ uneɣlaf dakken iẓuyar (qawanin) ay yesseddayen Tadukli n Lmeɣreb Aɛṛab ttwaxedmen- 27 n yiseggasen aya yernu ur ten-mazal myezdeg d umaḍal n wass-a, yernu iwekked-d dakken Lezzayer la tessutur seg 2012 akken ad d-yili wesmeskel (iṣlaḥ) n tdukli-a d uɛawed n tmuɣli deg yiẓuyar ay tt-id-yesbedden.