Asebter amenzawi

Asseqdec n yisejhaden: tanemselt tamnaḍant deg Tbatent ass n 7 Mayu

LEZZAYER TAMANEɣT- Ad tettwassuddes tnemselt (warca) tamnaḍant tis snat n yimenɣi mgal usseqdec n yisejhaden ass n 7 Mayu deg Tbatent, deg ukatar n usselɣu (iɛlam) d wesḥulfu mgal usseqdec n yisejhaden deg waddal, ɣef wakken ay d-yenna, ass n lexmis, weɣlif n yilemẓiyen d waddal.

Tanemselt-a yessuddes-itt weɣlif s wemɛawen d Usenduq n Unesco i weḥbas n usseqdec n yisejhaden, Ammas Aɣelnaw n Tesnajya n Waddal d Tesmilt (laǧna) Taɣelnawt n Yimenɣi mgal Usseqdec n Yisejhaden. Iswi n tnemselt-a d « axebber n yinaddalen d ussegrer-nsen (ta’ṭir) deg ussefqed n usseqdec n yisejhaden, tinegwa yettwagedlen d yimihiten yeqqnen ɣer usseqdec n yisemmaden n tuččit ur yettwasfeqden », ɣef wakken ay d-yenna weɣlif.

Ad ttekkin deg tnemselt-a azal n 300 n yinaddalen, isleɣmayen (mudarribin) d yisefraken (musayyirin) n teɣlamin taddalanin n Tbatent, Bgayet, Tibeskert, Sḍif, Skikda, Ɛennaba, Galma, Qsenṭina, Msila, Lbuṛj Buɛṛiṛij, Um Lebwaqi, Tbessa, Tixencelt, Suq Ahṛas, Ǧiǧel d Ṭṭaref, seg 14 n waddalen.

Deg tnemselt-a, ad msefhamen yemttekkiyen ɣef wahil i uḥezzeb mgal usseqdec n yisejhaden deg temnaḍt-a i uheyyi n ussefɛel n wahil aɣelnaw, ɣef wakken ay d-yenna weɣlif n yilemẓiyen d waddal.