Asebter amenzawi

Izrazaɣen ifalesṭiniyen: iger-d Ban Ki-moon tiɣri i ussidrem unzig n UNRWA

NEW YuRK (Tuddsa n Yeɣlanen Yeddukklen)– Iger-d umaru amatu n Tuddsa n Yeɣlanen Yeddukklen, Ban Ki-moon, i ussidrem unzig (mustadam) n Udiwan n Ussukkes d Yimahilen n Yeɣlanen Yeddukklen i Yezrazaɣen n Falesṭin deg Wegmuḍ Alemmas (UNRWA) imi lemɛawna n udiwan-a ḥwajen-tt s tidet yezrazaɣen (laǧi’in) ifalesṭiniyen.

« Ad awen-d-ssutreɣ, ass-a, ad tgem akk ayen umi tzemrem akken ad tɛawnem yernyu ad tbeddem ɣer yidis n udiwan n UNRWA deg uxeddim-nnes. Ajmaɛ n 81 n yimelyunen n yidulaṛen ay ixuṣṣen adiwan-a yessefk ad yili d tuzwirt i 2016 », ɣef wakken ay d-yenna Mass Ban ass n laṛebɛa deg yiwet n temlilit ay d-yellan i tnegga-a n Yeɣlanen Yeddukklen.

Yesmekti-d umaru amatu dakken UNRWA tesɛa 30.000 n yixeddamen ay la yettɛawanen 5,2 n yimelyunen n yezrazaɣen ifalesṭiniyen deg Wegmuḍ Alemmas, ladɣa deg yinurar n ussegmi, tadawsa (ṣiḥḥa) d yimeẓla inmettiyen (xadamat iǧtimaɛiyya).

« Adiwan n UNRWA la yetturar dduṛ n usserked s lemɛawna n yezrazaɣen ifalesṭiniyen deg temnaḍt-a yellan ɣef ssebba », ɣef wakken ay d-yenna, am wakken ay d-yerna dakken nnfeɛ n tmura n umaḍal atan deg weḍman n ukemmel n uxeddim n tnegga-a (wakala).

Adiwan n UNRWA yella-d seg tuddsiwin ay d-yerẓan asalu deg wenrar n ussegmi deg tegnit n tuɛjilin, yernu tamsalt-a ad d-tili d asentel n Tqacuct Talsant Tamaḍlant ad d-yilin ussan n 23 d 24 Mayu deg Sṭembul, deg Ṭṭerk.

Tanegga-a n Yeɣlanen Yeddukklen tesnulfa-d titwilin (tiqniyyat) timaynutin deg usselmed s lbeɛd d « yimukan n laman » aydeg arraw n yezrazaɣen ifalesṭiniyen zemren ad ɣren, ɣef wakken ay d-tenna Tuddsa n Yeɣlanen Yeddukklen.