Asebter amenzawi

Tazikkent tamazdayt n « Umennuḍ n Tfirɛeqqest » deg Lezzayer Tamaneɣt

LEZZAYER TAMANEɣT – Tebda, ass n lexmis deg usalay (mutḥaf) aɣelnaw n Bardo, yiwet n tzikkent tamazdayt n tugniwin isem-nnes « Amennuḍ n Tfirɛeqqest » aydeg d-tettban tmeddurt n yal ass d lbenyan n temdinin n Kuba. Tazikkent-a llant deg-s ama d tiwlafin, ama d tifelwiyin (lawaḥat) n teklut.

Tazikkent-a tekka-d seg yiwen n wemsegraw gar yinaẓuren idzayriyen d yikubiyen ay d-yellan deg Yunyu n 2015 s ṛṛay n usewlaf (muṣawwir) Karim Abdesselam. Tugniwin ay d-yersen deg-s d tid ay yesnarmen amcabi yellan deg yedles d tmetti n Lezzayer ed Kuba.

Tugniwin n usewlaf akubi Ariel Arias d tid ay d-yeḍḍfen tudert n yal ass n yigerdan ikubiyen, d tid ay « d-yesnulfuyen tiḥkayin » yernu ttgent-d « assaɣ n yiḥulfan » gar unerzaf d wemdan ay yettwaṣewwren.

Yessken-d unaẓur-a daɣ, s tewlafin ay d-yeḍḍef deg Havana, amgerrad gar lbenyanat n temdint-a iḥebsen deg wakud d yimezdaɣen-nnes ay la yettewliwilen deg tudert-nsen. Axeddim-a yesskanay-d « Kuba n wass-a » sdat yibeddilen imeqranen ay la d-yettilin deg tallit-a.

Ma d tasewlaft tafṛensist-taspenyulit Barbara Coello yellan d tameɣnast n teɣdemt (ɛadala) tanmettit, tessers-d ula d nettat tiwlafin-nnes ay d-yesskanayen tagnit n tsednan tikubiyin, tagadda gar wergaz d tmeṭṭut d yizerfan n yigerdan s wesskan n kra n teswiɛin n tudert.

Tanaẓurt Souad Douibi, seg yidis-nnes, tessers-d tifelwiyin, tiwlafin d yiselsa (azya’) ay d-yesseknen amek ay tettwali igmamen (aḥya’) iqburen n Havana, d tid ay d-yesskanen amcabi deg tsertit tanmettit gar Lezzayer d Kuba.