Asebter amenzawi

Amyager gar tenmazult n uselway n Wegraw Aɣerfan d umesṛabul n Yeɣlanen Yeddukklen ɣef tdawsa

LEZZAYER TAMANEɣT- Yella-d wemyager, ass n lexmis deg Lezzayer Tamaneɣt, gar tenmazult n uselway n Wegraw Aɣerfan Aɣelnaw, Dalia Ghania d umesṛabul uzzig n Yeɣlanen Yeddukklen ɣef wezref n tdawsa (ṣiḥḥa), Dainius Puras, ay d-yerzan ɣef Lezzayer s uneɛruḍ sɣur unabaḍ (ḥukuma).

« Yella-d wemyager-a ɣef tegnit n tdawsa deg Lezzayer. Ssukken-d tiṭ, sin-a n yidisan, ɣef tsemmeskal (iṣlaḥat) tigejdanin ay d-tebda Lezzayer s ṛṛay n uselway n tegduda, Mass Abdelaziz Bouteflika, ladɣa tamenḍawt ay yettwaceggren (ṛuǧiɛat) aydeg ttunefken ugar n yizerfan i yemdanen d tmazdayin », ɣef wakken ay d-yenna welɣu n Wegraw.

Tenna-d Massa Dalia dakken Lezzayer tesseḥbibir ɣef « yizerfan n yiɣermanen i udawi d webdad ad asen-yebded uwanak, ladɣa seg yidis n uḥezzeb d yimenɣi mgal waḍḍanen izerrɛen d wid ineṭṭḍen », ɣef akken ay d-yenna welɣu-a.

Nnig waya, tqeddem-d daɣ Massa Dalia « iɣawasen (muxaṭṭaṭat) iḥricanen igejdanen ay d-tebda Ldzayer am Uɣawas Aɣelnaw Asuddsan n Yimenɣi mgal Yisekkiren n Waḍḍanen Inalliyen (2015-2018) d Uɣawas Aɣelnaw n Yimenɣi mgal Ukensir (2015-2019).

Ma d amazan (na’ib) Kamel Abazi, yessawel-d ɣef tegnit n tdawsa deg twilayin n wenẓul (ǧanub) yernu yenna-d dakken tiwilayin-a sɛant, imir-a, isbiṭaren isdawanen i lmend n usselhu n yimeẓla idawsanen n tɣara deg ukatar n tneflit tunzigt yernu s uqader n lewṣayat n uselway n tegduda.