Asebter amenzawi

Taḥemla n "Yisugan Iẓerwalen" tella-d i unewweɛ n tdamsa (aneɣlaf)

TIPAZA– Yenna-d uneɣlaf n tkerrazt, Sid Ahmed Ferroukhi, ass n ssebt deg Tipaza, dakken taẓrigt (ṭabɛa) tis 4 n tḥemla n Yisugan (mawani’) Iẓerwalen tella-d i uttekki n yisugan deg unewweɛ n tdamsa taɣelnawt.

Yenna-d uneɣlaf aya deg yiwen n wegni n ṛṛadyu ay d-yellan deg usagen n Guraya, yernu ḥedṛen deg-s daɣ yineɣlafen n yimahilen inagduden (acɣal ɛumumiyya) d umesni (naql) d uwali n Tipaza (Massaw Abdelkader Ouali, Boudjemaa Talai d Abdelkader Kadi). S waya, yenna-d Mass Ferroukhi dakken « asagen d tallunt tadamsant, tamerrayant d temsenzit yernu yessefk ad yurar dduṛ s wazal-nnes deg unewweɛ n tdamsa taɣelnawt ».

Yesmekti-d dakken tasuddest (istratiǧiyya) n weḥric-a netta d assiweḍ n wemḍan (ɛadad) n yisugan n wegmar ɣer 47 deg 14 n twilayin, yili ass-a, Ldzayer tesɛa ala 32 seg yisugan-a, am wakken ad d-ttwasduqqsen 200 n yisenfaren n ussefti deg weḥric n tkessawt n yiselman.

Iswi n uneɛruḍ n yineɣlafen n yeḥricen niḍen deg tɣimit-a netta d assefruri n tmuɣli tucrikt.

Ma d aneɣlaf n yimahilen inagduden yenna-d dakken aḥric-nnes yebges-d akken ad yebnu isugan yernu ad ten-yeqqen ɣer yebriden imazzalen d yebriden n wuzzal akken ad yessifses tiddit n sselɛa yernu ad tesɛu tmurt aẓeḍḍa aɣelnaw ad yettekkin deg tdamsa taɣelnawt yettwanewwɛen.

ɣef leḥsab n Mass Ouali, yessefk ad tettwebni tdumṣukt tatrart ad yeddun d tegna (maɛayir) tigraɣlanin yernu ad tettqadar tawennaḍt.