ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵜⵉⵏⴻⴳⵣⴰⵔⵉⵏ ⵏ 8 ⵎⴰⵢⵓ 1945: ⴷ ⴰⴱⵔⵉⴷ ⵉⵏⴻⵊⵕⴻⵏ ⵉ ⵜⴻⴳⵔⴰⵡⵍⴰ ⵏ ⵡⴻⵙⵍⴻⵍⵍⵉ ⴰⵖⴻⵍⵏⴰⵡ (ⵉⵙⴷⴰⵡⴰⵏⴻⵏ)
ⵡⴻⵀⵕⴰⵏ – ⵏⵏⴰⵏ-ⴷ ⵢⵉⵙⴻⵍⵎⴰⴷⴻⵏ ⵏ ⵓⵎⴻⵣⵔⵓⵢ ⵢⴻⵜⵜⴻⴽⴽⴰⵏ ⴷⴻⴳ ⵡⴻⵎⵢⴰⴳⴻⵔ ⵏ « ⵜⵏⴻⴳⵣⴰⵔⵉⵏ ⵏ 8 ⵎⴰⵢⵓ: ⵉⵙⵔⵓⵙⴻⵏ ⴷ ⵡⴰⵢⴻⵏ ⵡⵓⵖⵓⵔ ⵡⵡⴹⴻⵏ » ⴰⵙⵙ ⵏ ⵍⵃⴻⴷⴷ ⴷⴻⴳ ⵜⴻⵙⴷⴰⵡⵉⵜ ⵏ ⵡⴻⵀⵕⴰⵏ, ⴷⴰⴽⴽⴻⵏ ⵜⵉⴷⵢⴰⵏⵉⵏ-ⴰ ⴰⵢ ⵉⵀⵓⵣⵣⴻⵏ ⴰⵛⵃⴰⵍ ⵏ ⵜⴻⵎⵏⴰⴹⵉⵏ ⵏ ⵜⵎⵓⵔⵜ « ⵏⴻⵊⵕⴻⵏⵜ-ⴷ ⴰⴱⵔⵉⴷ ⵉ ⵡⴻⵎⴳⴰⵔⵓ-ⵏⵏⵉ ⵓⵔⴱⵉⵃ ⵏ ⵡⴻⵙⵍⴻⵍⵍⵉ ⴰⵖⴻⵍⵏⴰⵡ ».
ⴷⴻⴳ ⵓⵙⴰⵔⴰⴳ-ⴰ ⴰⵢ ⴷ-ⵜⴻⵙⵙⵓⴷⴷⴻⵙ ⵜⴻⵎⵏⴰⴹⵜ ⵜⴰⵙⴻⵔⴷⴰⵙⴰⵏⵜ ⵜⵉⵙ 2 ⴷⴷⴰⵡ ⵜⵙⴻⵍⵡⵉⵜ ⵏ ⵓⵊⵉⵏⵉⵕⴰⵍ-ⴰⵎⴰⵊⵓⵕ ⵙⴰⵉⴷ ⴱⴻⵢ, ⵢⴻⵏⵏⴰ-ⴷ ⵡⴻⵙⴷⴰⵡⴰⵏ ⵔⴰⴱⴰⵀ ⵍⵧⵓⵏⵉⵛⵉ ⴷⴰⴽⴽⴻⵏ ⵜⵉⵎⴻⵏⵖⵉⵡⵉⵏ-ⵏⵏⵉ ⴰⵢ ⴷ-ⵢⴻⵍⵍⴰⵏ ⴷⴻⴳ ⵜⴻⴷⵢⴰⵏⵉⵏ ⵏ 1945 ⵍⵍⴰⵏⵜ-ⴷ ⴷ ⴰⴽⴻⵎⵎⴻⵍ ⵏ ⵜⵎⴻⵏⵖⵉⵡⵉⵏ ⴰⵢ ⵜⴳⴰ ⴼⵕⴰⵏⵙⴰ ⴷⴻⴳ ⵍⴷⵣⴰⵢⴻⵔ ⵙⴻⴳ 1830.
ⵢⴻⵔⵏⴰ-ⴷ ⴷⴰⴽⴽⴻⵏ « ⵜⵉⵊⵔⵉⵎⵉⵏ-ⴰ ⴷ ⴰⵃⵔⵉⵛ ⵙⴻⴳ ⴹⴹⴱⵉⵄⴰ ⵏ ⵜⴻⵥⵔⴰⵀⵔⴻⵙⵜ (ⴽⵓⵍⵓⵏⵢⴰⵍⵉⵢⵢⴰ) ⵜⴰⴼⵕⴻⵏⵙⵉⵙⵜ ⴷ ⵜⴻⵙⵏⴰⴽⵜⵉ-ⵏⵏⴻⵙ, ⴷ ⵜⵉⵏ ⵢⴻⴱⵏⴰⵏ ⵖⴻⴼ ⵜⵃⴻⵇⵔⴰⵏⵉⵜ, ⵜⴰⵎⵙⵉⵔⵉⵜ (ⵄⵓⵏⵚⵓⵔⵉⵢⵢⴰ) ⴷ ⵓⵖⴻⵍⵍⴻⵜ ⵏ ⵢⵉⵖⴻⵔⴼⴰⵏ ⵓⵔ ⵢⴻⵍⵍⵉⵏ ⴷ ⵓⵕⵓⴼⵉⵢⴻⵏ », ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵔⵏⴰ ⴷⴰⴽⴽⴻⵏ ⵜⴰⴷⵓⴽⵍⵉ ⴰⵢ ⴷⴷⵓⴽⴽⵍⴻⵏ ⵢⵉⴷⵣⴰⵢⵔⵉⵢⴻⵏ ⴷⴻⴳ ⵓⵎⵓⵙⵙⵓ ⵏ ⵜⵔⴻⵏⵏⴰⵡⵜ ⵏ ⵜⵍⴻⵍⵍⵉⵢⵉⵏ ⵜⵉⵎⴻⴳⴷⴰⵢⵉⵏ ⵜⴻⵙⵙⴻⵡⵀⴻⵎ ⴼⵕⴰⵏⵙⴰ, ⴷⵖⴰ ⴷ ⴰⵢⴰ ⴰⵢ ⵜⵜ-ⵢⴻⴵⴵⴰⵏ ⴰⴷ ⵜⴻⴳ ⵜⵉⵊⵔⵉⵎⵉⵏ-ⴰ ⵓⵔ ⵢⴻⵎⵄⵉⵏⴻⵏ ⴰⴽⴽⴻⵏ ⴰⴷ ⵜⴻⵙⵙⴻⴷⵔⴻⵎ ⴰⵖⵍⴰⵏ ⴰⴷⵣⴰⵢⵔⵉ.
ⵉⵡⴻⴽⴽⴻⴷ-ⴷ ⴷⴰⵖ ⵡⴻⵎⵙⴰⵔⴰⴳ-ⴰ ⵖⴻⴼ ⵜⴷⵓⴽⵍⵉ ⵏ ⵡⴻⵖⵔⴻⴼ ⴰⴷⵣⴰⵢⵔⵉ ⴷ ⵓⵄⴻⵡⵡⴻⵍ-ⵏⵏⴻⵙ ⴰⴽⴽⴻⵏ ⴰⴷ ⴷ-ⵢⴻⵔⵔ ⴰⵣⴰⵔⵓⴳ (ⵉⵙⵜⵉⵇⵍⴰⵍ) ⴰⵖⴻⵍⵏⴰⵡ ⴷⴷⴰⵡ ⵕⵕⴰⵢ ⵏ ⵜⴻⵔⵏⵉ ⵏ ⵡⴻⵙⵍⴻⵍⵍⵉ ⴰⵖⴻⵍⵏⴰⵡ ⴷ ⵜⵔⴻⴷⵙⴰ ⵏ ⵡⴻⵙⵍⴻⵍⵍⵉ ⴰⵖⴻⵍⵏⴰⵡ.
ⵎⴰ ⴷ ⴰⵒⵕⵓⴼⵉⵙⵓⵔ ⵢⴻⴽⵀⵍⴻⴼ ⴰⴱⴷⴻⵍⴽⴰⴷⴻⵔ ⵢⴻⵏⵏⴰ-ⴷ ⴷⴰⴽⴽⴻⵏ ⵜⵉⵏⴻⴳⵣⴰⵔⵉⵏ ⵏ 8 ⵎⴰⵢⵓ 1945 ⵔⴻⵥⵎⴻⵏⵜ ⴰⴱⵔⵉⴷ ⴰⵢ ⵢⴻⵙⵙⴰⵡⴹⴻⵏ ⵖⴻⵔ ⵓⵙⵙⴻⵏⴽⴻⵔ ⵏ ⵢⵉⵎⴻⵏⵖⵉ ⵉⵎⵙⴻⵍⵍⴻⵃ. « ⵉⴼⵕⴻⵏⵙⵉⵙⴻⵏ ⵓⴽⵉⵏ ⴷⴰⴽⴽⴻⵏ ⴳⴰⵏ ⵜⵓⵛⵛⴹⴰ ⵙ ⵜⴻⵊⵔⵉⵎⵉⵏ-ⴰ, ⴰⵛⴽⵓ ⴷ ⴰⵢⴰ ⴰⵢ ⵢⴻⴵⴵⴰⵏ ⵉⴷⵣⴰⵢⵔⵉⵢⴻⵏ ⴰⴷ ⴷ-ⴱⴷⵓⵏ ⵉⵎⴻⵏⵖⵉ ⵏ ⵡⴻⵙⵍⴻⵍⵍⵉ ⵏ ⵜⵎⵓⵔⵜ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵉⵡⴻⴽⴽⴻⴷ.
