Asebter amenzawi

Tinegzarin n 8 Mayu 1945: d abrid inejṛen i Tegrawla n weslelli aɣelnaw (isdawanen)

WEHṚAN – Nnan-d yiselmaden n umezruy yettekkan deg wemyager n « Tnegzarin n 8 Mayu: isrusen d wayen wuɣur wwḍen » ass n lḥedd deg tesdawit n Wehṛan, dakken tidyanin-a ay ihuzzen acḥal n temnaḍin n tmurt « nejṛent-d abrid i wemgaru-nni urbiḥ n weslelli aɣelnaw ».

Deg usarag-a ay d-tessuddes Temnaḍt Taserdasant tis 2 ddaw tselwit n Ujiniṛal-Amajuṛ Said Bey, yenna-d wesdawan Rabah Lounici dakken timenɣiwin-nni ay d-yellan deg tedyanin n 1945 llant-d d akemmel n tmenɣiwin ay tga Fṛansa deg Ldzayer seg 1830.

Yerna-d dakken « tijrimin-a d aḥric seg ḍḍbiɛa n teẓrahrest (kulunyaliyya) tafṛensist d tesnakti-nnes, d tin yebnan ɣef tḥeqranit, tamsirit (ɛunṣuriyya) d uɣellet n yiɣerfan ur yellin d uṛufiyen », am wakken ay d-yerna dakken tadukli ay ddukklen Yidzayriyen deg Umussu n Trennawt n Tlelliyin Timegdayin tessewhem Fṛansa, dɣa d aya ay tt-yeǧǧan ad teg tijrimin-a ur yemɛinen akken ad tessedrem aɣlan adzayri.

Iwekked-d daɣ wemsarag-a ɣef tdukli n weɣref adzayri d uɛewwel-nnes akken ad d-yerr azarug (istiqlal) aɣelnaw ddaw ṛṛay n Terni n Weslelli Aɣelnaw d Tredsa n Weslelli Aɣelnaw.

Ma d apṛufisur Yekhlef Abdelkader yenna-d dakken tinegzarin n 8 Mayu 1945 reẓment abrid ay yessawḍen ɣer ussenker n yimenɣi imselleḥ. « Ifṛensisen ukin dakken gan tuccḍa s tejrimin-a, acku d aya ay yeǧǧan Idzayriyen ad d-bdun imenɣi n weslelli n tmurt », ɣef wakken ay d-iwekked.