Asebter amenzawi

Arẓam n Tfaska Tuṛufit tis 17 deg Lezzayer s uẓawan n ucennak anijiri Bambino

LEZZAYER TAMANEɣT– S uẓawan d ccna n ucennay anijiri Bombino ay terẓem, ass n letniyen Tfaska Tadelsant Tuṛufit tis 17 deg Lezzayer Tamaneɣt, d tin ad yeḍḍfen gar 9 d 21 Mayu, yernu ḥedṛen deg-s aṭas n lɣaci deg yiwet n teswiɛt n zzhu d tmeɣra.

Deg snat-nni n tsaɛtin ay yeḍḍef ubaraz-nnes, yecna-d Bombino 20 n tezlatin s tmaceɣt deg tzeqqa n Ibn Zeidoun n Riadh El Feth deg yiwen n yeswaɣ n tumert (lfeṛḥ).

Aẓawan n Bombino dindin yeɛjeb i yemfeṛṛǧen ay ibedden ula deg yegniren n uɛeddi, imi ay d-yessaki deg-sen aḥulfu n tneṣlit s uẓawan-nni amaceɣ ucbiḥ ay d-ineccden win isellen ad yewliwel, ad yecḍeḥ.

3 n yemẓawanen ay as-iwten i ucennay Bombino mi yella icennu, yernu aẓawan-nnes d win aydeg xelḍen yiɣaniben n ureggae, arock d weblues. Gar tezlatin ay d-yecna llant « Tar Hanin », « Jaguar », « Tim Tar », « Azaman Tiliade », « Iyat Ninhay », « Akukas », « Amidinin » d « Aman ».

Yecna-d Bombino ɣef ccbaḥa n yimeẓriyen (manaḍir) n temnaḍt n Ssaḥel, tudert deg tmetti, tammidwa (ṣadaqa), ansayen n Yimucaɣ, temɣer n uneẓruf s tmuɣli n tmedyezt d tayri, yernu yenna-d ucennay-a dakken yebɣa ad d-yessiweḍ s ccna-nnes « izen n talwit d tegmat ».