Asebter amenzawi

Bedoui: Iswi n uxeddim uqrib ɣer medden d asseqreb n unabaḍ ɣer uɣerman

TINDUF– Yenna-d uneɣlaf n tɣawsiwin n daxel, Noureddine Bedoui, ass n ttlata deg Tinduf, dakken iswi n uxeddim uqrib ay la yetteg unabaḍ (ḥukuma) netta d tuẓut n unermis (ittiṣal) yezgan d medden.

Deg yiwet n tɣimit n uxeddim d yigensasen (mutattilin) n tmetti taɣarimt n twilayt n Tinduf deg tgara n terzi-nnes ɣef twilayt-a, yenna-d uneɣlaf n tɣawsiwin n daxel dakken axeddim uqrib ay la yetteg unabaḍ s terzi ɣef wenrar d ayen ad yesjehden anermis yezgan d uɣerman (muwaṭin), yernu aya yedda deg webrid n ussefɛel n wahilen n uselway n tegduda, Abdelaziz Bouteflika.

Tirzi-a ɣef twilayt n Tinduf tesskanay-d lebɣi i ussefɛel n ussirem n yiɣermanen yernu aya yessutur-d seg yiduba inagduden (suluṭat ɛumumiyya) ugar n wussisen akken ad d-lhun s yiɣeblan n medden, ɣef wakken ay d-iwekked Mass Bedoui.

Iɣeblan ay d-yettwabedren deg wemyager-a lhan-d ladɣa d temsal n tdawsa (ṣiḥḥa), tukksa n yemɣuzen i waman n tissit d tneflit (tanmiya) n tkessawt n yileɣman deg temnaḍt-a.

Aneɣlaf, ay d-yennan dakken iɣeblan-a d uzrifen, iɛuhed ad ten-yessiweḍ i yeḥricen ay terza temsalt akken ad ten-frun s wayen iwatan.