Asebter amenzawi

Ad yaweḍ ṛaselmal n Taggazt n Lezzayer ɣer umelyaṛ n yidulaṛen s lluzin n usiman n Ɛin Lekbira

LEZZAYER TAMANEɣT– Assidef n Teṛmist n Yisimanen n Ɛin Lekbira (SCAEK, Sḍif) ɣer taggazt (burṣa) n Lezzayer d ayen ad yessiwḍen ṛaselmal n taggazt-a ɣer umelyaṛ n yidulaṛen, ɣef wakken ay d-yenna ass n ttlata unemhal amatu n Teṛmist n Ussefrek n Taggazt n Wazalen (SGBV), Mass Yazid Benmouhoub.

« S wadaf n teṛmist n SCAEK, ad nesfugel amelyaṛ n yidulaṛen amezwaru » n ṛaselmal, yili imir-a, raṣelmal n taggazt yewweḍ ɣer 15 n yimelyaṛen n yidinaṛen ɣef wakken ay aɣ-d-yenna Mass Benmouhoub deg yijifeṛ n wass n usselɣu (iɛlam) ɣef ummeṛki n teṛmist-a ɣer taggazt. I wesmekti, taṛmist-a yellan d afurk seg Tegrawt Tanagdudt n Yisimanen n Lezzayer (GICA) ad d-yili ummeṛki-nnes deg taggazt gar 15 Mayu d 13 Yunyu.

Yenna-d daɣ Mass Benmouhoub dakken la yettṛaju ad rnunt ad d-adfent 4 n teṛmisin tinagdudin niḍen seg-a ɣer tgara n useggas n 2016, yernu d aya ad yesmeɣren amḍan (ɛadad) n teṛmisin deg taggazt n Lezzayer ɣer 10.

Ti, ɣef wakken ay d-yenna umasay-a (mas’ul), d snat n lluzinat niḍen n usiman yeqqnen ɣer tegrawt n GICA, tabanka n Wesmad Aɣerfan Adzayri (CPA), Cosider Carrieres (d afurk n tegrawt tanagdudt n Cosider) d Tkebbanit Taɣelnawt n Usenkid d Wallus n Usenkid (CAAR).

Seg yidis niḍen, snat n teṛmisin tinagdudin niḍen ad yadfen ɣer taggazt s ureḍḍal ay yettwassefran ad d-yili deg 2016 d 2017, ɣef wakken ay d-yenna unemhal amatu n taggazt, war ma yekcef-d ismawen n snat-a n teṛmisin.