Asebter amenzawi

Tawilayt n Lezzayer: asɛeddi n Uɣawas n uwehhi i uheyyi n twilayt

LEZZAYER TAMANEɣT - Sɛeddan wufrinen n Wegraw Aɣerfan n Twilayt n Lezzayer, ass n laṛebɛa, s tegti (aɣlabiyya), aɣawas n uwehhi n uheyyi n twilayt n Ldzayer (2015-2035) ad yefken ṣṣifa tasegdant (miɛmariyya) tamaynut i tmaneɣt.

Yenna-d uwali n Lezzayer, Abdelkader Zoukh, deg tedwilt tanumant n Wegraw i weskasi (niqac) d wesɛeddi n uɣawas-a, dakken iduba (suluṭat) unnigen n tmurt fkan azal d ameqran i usenfar-a asuddsan.

Aɣawas-a yeqqim 8 n yiseggasen akken ad d-yewjed yernu ttekkan deg-s yimuzzag (muxtaṣṣin) d yimazzayen (xubara’), am wakken ay d-iwekked uwali dakken ur yettḍurru ikalen n tkerrazt.

Yesmekti-d uwali dakken akaram-a (milaf) ad yettunefk, sakkin, i uneɣlaf n tnezduɣt, sakkin ad t-yessenqed uneɣlaf amenzu, Abdelmalek Sellal, akken ad t-yesɛeddi.

Deg yiwet n tseɣrut (taṣriḥ) ay aɣ-d-iga Mass Mohamed Yazid Gaouaoui, anemhal n uheyyi n temdint n twilayt n Ldzayer, yenna-d dakken asɛeddi n ukaram-a anamek-nnes beddu n ussenqed n 169 n yikaramen yeqqnen ɣer uɣawas n tuḍḍfa n wakal deg 57 n tɣiwanin n twilayt yernu ad yettekki waya deg uferru n wugur n lexṣaṣ n wakal deg twilayt n Lezzayer.