Asebter amenzawi

Tafaska Tuṛufit tis 17 deg Lezzayer: taɣect tamaynut n uẓawan n ufado deg Tmaneɣt

LEZZAYER TAMANEɣT – Yella-d ubaraz (ḥafl) n uẓawan n ufado aydeg yexleḍ uẓawan amensay d wetrar ass n lexmis tameddit deg Ldzayer Tamaneɣt, s taɣect n tcennayt tapuṛtugalit Claudia Madur, d tameɣra aydeg ḥedṛen aṭas n lɣaci.

Madur, ay yettekkan s yisem n Puṛtugal deg teẓrigt-a tis 17 n Tfaska Tadelsant Tuṛufit deg Lezzayer Tamaneɣt, tessken-d i Wayt Tmaneɣt abrid amaynu ay yuɣ uẓawan n ufado. Tafaska-a, i wesmekti, la d-tettili seg wass n letniyen deg Lezzayer, Bgayet ed Tizi Wezzu.

S taɣect-nnes tuḥzint, ijehden yernu yettheddinen, tessaweḍ Claudia Madur ad tesseskeṛ lexwaḍer n yemfeṛṛǧen s yisefra n uẓawan akelsak n ufado, d aẓawan n ummekti n wayen yezrin, n wesḥissef ɣef tayri ur yeǧǧuǧgen d unnejli. Yefka-d daɣ uẓawan-nnes tamuɣli ɣef yizenqan n Lisbun, tamaneɣt n Puṛtugal aydeg d-ilul uẓawan-a yettwaḥerzen ɣer Unesco deg 2011.

Deg turart-nnes, tefka tcennayt-a tilelli i yiman-nnes deg yisefra, deg wakud aydeg allalen yeddan d taɣect-nnes d imensayen, d wid ayyes yettwassen uẓawan n ufado. S waya, tecna-d Claudia Madur s uẓawan n tgiṭart tapuṛtugalit (igan am tmundulint) d snat n tgiṭarin tikiwanin.

Ccna n Madur temseḍfar deg-s tiẓeḍt n yimesli d ṛṛuḥ n tmeɣra, d urar yettɛeddin seg uḥulfu ɣer wayeḍ, seg taẓeyt ɣer unnefsusi, yernu d aya ay tt-yeǧǧan ad d-tefk aẓawan aydeg yexleḍ ufado akelsak ed tubbiyin ay d-tesnulfa nettat s uɣanib (namaṭ) atrar, yernu d aya ay iɛejben imfeṛṛǧen-nnes deg tzeɣɣa n Ibn Zaydoun, deg Riadh El Fath.