ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⴰⵏⵎⴰⵀⴰⵍ ⴰⴼⴰⵍⴻⵙⵟⵉⵏⵉ: ⵉⵎⴻⵏⵖⵉ ⴰⴼⴰⵍⴻⵙⵟⵉⵏⵉ ⴷ ⵜⴰⵎⵙⴰⵍⵜ ⵜⴰⴳⴻⵊⴷⴰⵏⵜ
ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ– ⵢⴻⵏⵏⴰ-ⴷ ⵡⴻⵏⵎⴰⵀⴰⵍ (ⵙⴰⴼⵉⵔ) ⴰⴼⴰⵍⴻⵙⵟⵉⵏⵉ ⴷⴻⴳ ⵍⴻⵣⵣⴰⵢⴻⵔ, ⵍⵧⵓⴰⵉ ⴰⵉⵙⵙⴰ, ⴰⵙⵙ ⵏ ⵍⵃⴻⴷⴷ ⴷⴻⴳ ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ, ⴷⴰⴽⴽⴻⵏ ⵜⴰⵎⵙⴰⵍⵜ ⵜⴰⴼⴰⵍⴻⵙⵟⵉⵏⵉⵜ ⵓⵔ ⵜⴻⵍⵍⵉ ⴷ ⵜⴰⵎⵙⴰⵍⵜ ⴽⴰⵏ ⵜⴰⵍⵙⴰⵏⵜ (ⵉⵏⵙⴰⵏⵉⵢⵢⴰ) ⵡⴰⵏⴰⴳ ⵜⵓⵖⴰⵍ ⴷ « ⵜⴰⵎⵙⴰⵍⵜ ⵜⴰⵙⴻⵔⵜⴰⵏⵜ ⵜⴰⵍⴻⵎⵎⴰⵙⵜ », ⴰⵎ ⵡⴰⴽⴽⴻⵏ ⴰⵢ ⴷ-ⵉⵡⴻⴽⴽⴻⴷ ⴷⴰⴽⴽⴻⵏ ⵉⴼⴰⵍⴻⵙⵟⵉⵏⵉⵢⴻⵏ ⵓⵔ ⵜⵜⵙⴻⵎⵎⵉⵃⴻⵏ ⴷⴻⴳ ⵡⴻⵣⵔⴻⴼ-ⵏⵙⴻⵏ ⵏ ⵡⵓⵖⴰⵍ.
ⵢⴰⵍ ⵜⵉⵃⵉⵍⴻⵜ ⴰⴷ ⴷ-ⵢⴻⴳ ⵓⵛⴻⵏⴳⵓ ⵉⵙⵕⴰⵢⵉⵍⵉ ⴰⴽⴽⴻⵏ ⴰⴷ ⵉⵏⴻⵖ ⵏⴻⵖ ⴰⴷ ⵢⴻⵙⵍⴰⵥ ⴰⵖⵔⴻⴼ ⴰⴼⴰⵍⴻⵙⵟⵉⵏⵉ, ⴰⵖⵔⴻⴼ-ⴰ ⴰⴷ ⴰⵙ-ⴷ-ⵢⴰⴼ ⵜⵉⵃⵉⵍⴻⵜ ⴰⴷ ⵉⴽⴻⵎⵎⴻⵍ ⴰⵣⴱⵓ-ⵏⵏⴻⵙ (ⵎⵓⵇⴰⵡⴰⵎⴰ), ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⴷⵉⵒⵍⵓⵎⴰⵜⵉ-ⴰ ⴰⴼⴰⵍⴻⵙⵟⵉⵏⵉ ⴷⴻⴳ ⵢⵉⵡⴻⵏ ⵏ ⵡⴻⵎⵢⴰⴳⴻⵔ ⴰⵢ ⴷ-ⵢⴻⵍⵍⴰⵏ ⵉ ⵡⴻⵙⴼⵓⴳⴻⵍ (ⵉⵃⵜⵉⴼⴰⵍ) ⵙ ⵓⵎⵓⵍⵍⵉ ⵡⵉⵙ 68 ⵏ « ⵏⵏⴻⴽⴱⴰ » (ⴰⵅⴻⵚⵚⴰⵔ) ⴰⵢ ⵜⴻⵙⵙⵓⴷⴷⴻⵙ ⵜⵎⴰⵀⴻⵍⵜ ⵜⴰⴼⴰⵍⴻⵙⵟⵉⵏⵉⵜ ⴷⴻⴳ ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ.
«ⴷⴻⴳ ⵜⵉⴷⴻⵜ, ⵏⴻⵙⵏⴻⵔⵏⴰ ⵜⵜⴰⵡⵉⵍⴰⵜ-ⵏⵏⴻⵖ ⵏ ⵡⴻⵣⴱⵓ ⵎⴳⴰⵍ ⵜⵎⴰⵛⵉⵏⵜ ⵜⵉⵙⵕⴰⵢⵉⵍⵉⵜ ⵏ ⵡⴻⵎⴳⴰⵔⵓ, ⵢⴻⵔⵏⵓ ⵓⵍⴰ ⵎⴰ ⵓⵔ ⵎⵙⴻⴼⵀⴰⵎⴻⵏ ⵢⵉⴼⴰⵍⴻⵙⵟⵉⵏⵉⵢⴻⵏ ⴳⴰⵔ-ⴰⵙⴻⵏ, ⵎⴰⵛⴰ ⴷⴷⵓⴽⴽⵍⴻⵏ ⴷⴻⴳ ⵜⴻⴳⵔⵡⵍⴰ-ⵏⵙⴻⵏ ⵎⴳⴰⵍ ⵓⵛⴻⵏⴳⵓ ».
ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵜⴰⴳⵏⵉⵜ ⵜⴰⵙⴻⵔⵜⴰⵏⵜ, ⵢⴻⵏⵏⴰ-ⴷ ⵎⴰⵙⵙ ⵍⵧⵓⴰⵉ ⴰⵉⵙⵙⴰ ⴷⴰⴽⴽⴻⵏ ⵢⴻⵙⵙⴻⴼⴽ ⴰⴷ ⴷ-ⵉⵍⵉⵏⵜ ⵜⴻⴼⵔⴰⵏⵉⵏ ⴰⴽⴽⴻⵏ ⴰⴷ ⴷ-ⵢⵉⵍⵉ ⵓⵏⴰⴱⴰⴹ ⴰⵢⴷⴻⴳ ⴰⴷⴰⴱⵓ ⴻⴷ ⵜⴻⵏⵎⴻⴳⵍⴰ (ⵎⵓⵄⴰⵔⴰⴹⴰ) ⴰⴷ ⵎⵢⴻⵙⵙⵎⴰⴷⴻⵏ, ⵢⴻⵔⵏⵓ ⵉⴳⴻⵔ-ⴷ ⵜⵉⵖⵔⵉ ⴰⴽⴽⴻⵏ ⴰⴷ ⵉⴼⴰⴽ ⵓⴱⴻⴹⴹⵓ ⵢⴻⵍⵍⴰⵏ ⴷⴻⴳ ⵡⴻⵖⵔⴻⴼ ⴰⴼⴰⵍⴻⵙⵟⵉⵏⵉ.
«ⴷ ⵜⴰⴷⵓⴽⵍⵉ ⴰⴷ ⴰⵖ-ⵢⴻⴵⴵⴻⵏ ⴰⴷ ⵏⴻⵔⵏⵓ ⵜⴰⵔⴳⵓⵍⵜ ⵜⵉⵙⵕⴰⵢⵉⵍⵉⵜ ⴰⵢ ⵉⵃⵓⵣⴰⵏ ⵙⵉⵏ ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⴼⴰⵍⴻⵙⵟⵉⵏⵉⵢⴻⵏ ⴷⴻⴳ ⵜⴻⵙⴼⵉⴼⵜ ⵏ ⵖⴻⵣⵣⴰ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵉⵡⴻⴽⴽⴻⴷ.
