Asebter amenzawi

Tafaska Tadelsant Tuṛufit tis 17: tagrawt n Gipsy.CZ tessken-d talɣiwin-nnes titrarin

LEZZAYER TAMANEɣT – Tga-d tegrawt n uẓawan n umaḍal ed uhiphop, « Gipsy.CZ », ass n lḥedd tameddit deg Lezzayer Tamaneɣt, yiwen n ubaraz (ḥafl) aydeg d-tewwi talɣiwin timaynutin n uẓawan, xelḍen deg-s yiɣaniben yemgerraden s wenya (ritm) n upolka, dance, ṛṛap ed uhiphop, yernu tga-d ahanay s tesnatwilt tumḍint aydeg ttwasqedcen wallalen n uẓawan azigan, akuṛdyun ed yimẓad.

Tagrawt-a tettekka s yisem n Tegduda Tačikit deg ukatar n Tfaska Tadelsant Tuṛufit tis 17 deg Lezzayer ay yebdan ass n 9 Mayu yezrin yernu d tikkelt tis snat aydeg ad twet deg Lezzayer. Abaraz-nnes yella-d deg tzeqqa n Ibn Zeidoun, deg Udiwan n Riadh El Feth yernu lɣaci ay iḥedṛen deg-s yeɛjeb-as lḥal.

Deg yiwet n tegnewt n tmeɣra ay d-yesmektayen s yihanayen (ɛuruḍ) n yizenqan n temdinin n Tuṛuft Talemmast, twet-d tegrawt-a 15 n tezlatin ay d-yecna Radek Banga s tčikit.

Acennay-a yellan daɣ d ameskar n tezlatin yernu d amẓawan (musiqar) iqeddem-d yal yiwet seg tezlatin-nnes s tanglizit uqbel ma yecna-tt-id, akken ad d-yessefhem ɣef wacu ay d-tcennu, am wakken ay d-yenced imfeṛṛǧen akken ad ceḍḥen ula s tɣimit, s ussewliwel n yifassen.

Tagiṭart ed ukuṛdyun yelha-d yid-sen Jan Sochor, ma d Tomas Baros yelha-d ed tabbast. Viliam Didias iwet imẓad yernu yessken-d tiɛɛuwja-nnes s yiwen n uẓawan d arurad (sariɛ).

Abaraz-a yeḍḍef 80 n tedqiqin s tezlatin ay d-iḥekkun ɣef tudert tanmettit, tayri, iɣeblan n yal ass, tamagit (huwiyya), aqbal n wiyaḍ, tumert n tudert ed werẓam n lbal deg uqader n wiyaḍ, d tid yesɛan anya iǧehden, ay d-inecden imfeṛṛǧen akken ad ceḍḥen.

Tafaska Tuṛufit mazal ad tkemml deg Ldzayer Tamaneɣt, Ɛennaba, Bgayet, Wehṛan ed Tizi Wezzu arma d 21 Mayu. Ass n letniyen ad d-yili uhanay n tmekkatt n tzemmaṛt Yazz Ahmed (seg Beḥṛin) ed tcennayt tadzayrit Amel Zen ad yettekkin s yisem n Tgelda Yeddukklen.