ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵜⵉⵕⵎⵉⵙⵉⵏ ⵏ ⵜⵏⴻⴳⴳⴰ ⵏ ⵢⵉⴼⴻⵔⴳⴰⵏ ⵉⵙⵏⴰⵜⵡⵉⵍⴰⵏⴻⵏ ⵙⵙⴰⴷⴼⴻⵏⵜ-ⴷ 300 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⴷⵉⵏⴰⵕⴻⵏ ⴷⴻⴳ 2015
ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⵜⵉⵕⵎⵉⵙⵉⵏ ⵢⴻⵎⵎⵓⵣⵣⴳⴻⵏ ⴷⴻⴳ ⵜⴻⵙⵏⴰⵜⵡⵉⵍⵉⵏ (ⵜⵉⴽⵏⵓⵍⵓⴵⵉⵢⵢⴰⵜ) ⵏ ⵓⵙⵙⴻⵍⵖⵓ ⴷ ⵜⴻⵖⵡⴰⵍⵜ ⴰⵢ ⵍⴰ ⵉⵅⴻⴷⴷⵎⴻⵏ ⴷⴻⴳ ⵜⵏⴻⴳⴳⴰ ⵜⴰⵖⴻⵍⵏⴰⵡⵜ ⵏ ⵡⴻⵙⵎⴰⵍ ⴷ ⵡⴻⵙⵏⴻⴼⵍⵉ ⵏ ⵢⵉⴼⴻⵔⴳⴰⵏ ⵉⵙⵏⴰⵜⵡⵉⵍⴰⵏⴻⵏ (ⴰⵏⵒⵜ) ⵏ ⵙⵉⴷⵉ ⵄⴻⴱⴷⴻⵍⵍⴰⵀ (ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ) ⵙⵙⴰⴷⴼⴻⵏⵜ-ⴷ 300 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⴷⵉⵏⴰⵕⴻⵏ ⵉ ⵜⵏⴻⴳⴳⴰ-ⴰ (ⵡⴰⴽⴰⵍⴰ) ⴷⴻⴳ 2015, ⵖⴻⴼ ⵡⴰⴽⴽⴻⵏ ⴰⵖ-ⴷ-ⵢⴻⵏⵏⴰ, ⴰⵙⵙ ⵏ ⵍⴻⵜⵏⵉⵢⴻⵏ, ⵓⵏⴻⵎⵀⴰⵍ ⴰⵎⴰⵜⵓ ⵏ ⵜⵏⴻⴳⴳⴰ-ⴰ.
45 ⵏ ⵜⴻⵕⵎⵉⵙⵉⵏ ⵢⴻⵎⵎⵓⵣⵣⴳⴻⵏ (ⵎⵓⵜⴰⵅⴰⵚⵚⵉⵚⴰ) ⴷⴻⴳ ⵜⴻⵙⵏⴰⵜⵡⵉⵍⵉⵏ ⵏ ⵓⵙⵙⴻⵍⵖⵓ ⴷ ⵜⴻⵖⵡⴰⵍⵜ ⴰⵢ ⵍⴰ ⵉⵅⴻⴷⴷⵎⴻⵏ ⴷⴻⴳ ⵜⵏⴻⴳⴳⴰ ⵏ ⵡⴻⵙⵎⴰⵍ ⴷ ⵡⴻⵙⵏⴻⴼⵍⵉ ⵏ ⵢⵉⴼⴻⵔⴳⴰⵏ ⵉⵙⵏⴰⵜⵡⵉⵍⴰⵏⴻⵏ ⵢⴻⵔⵏⵓ ⵙⵙⴰⴷⴼⴻⵏⵜ-ⴷ 300 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⴷⵉⵏⴰⵕⴻⵏ ⵉ ⵜⵏⴻⴳⴳⴰ-ⴰ ⴷⴻⴳ 2015, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵏⴻⵎⵀⴰⵍ-ⵏⵏⴻⵙ, ⴰⴱⴷⴻⵍⵀⴰⴽⵉⵎ ⴱⴻⵏⵙⴰⵧⵓⵍⴰ, ⴷⴻⴳ ⵢⵉⵊⵉⴼⴻⵕ ⵏ ⵢⵉⵡⴻⵜ ⵏ ⵜⴻⵔⵣⵉ ⵏ ⵓⵙⵙⴻⴼⵇⴻⴷ ⴰⵢ ⴷ-ⵜⴳⴰ ⵢⵉⵡⴻⵜ ⵏ ⵜⵎⴰⴳⵍⴰ (ⵡⴰⴼⴷ) ⵜⴰⵡⴰⵎⵏⵉⵜ (ⴷ ⵉⵎⴰⵙⵍⴰⴹⴻⵏ ⵏ ⵜⴻⵙⵎⵉⵍⵜ ⵏ ⵓⵎⴻⵙⵏⵉ ⴷ ⵜⴻⵖⵡⴰⵍⵜ ⵜⴰⵏⴻⵎⴳⴰⴳⵜ).
ⴰⵎⴻⴷⵅⵓⵍ ⵏ ⵜⵏⴻⴳⴳⴰ ⵜⴰⵖⴻⵍⵏⴰⵡⵜ ⵏ ⵡⴻⵙⵎⴰⵍ ⴷ ⵡⴻⵙⵏⴻⴼⵍⵉ ⵏ ⵢⵉⴼⴻⵔⴳⴰⵏ ⵉⵙⵏⴰⵜⵡⵉⵍⴰⵏⴻⵏ ⵢⴻⵜⵜⵡⴰⵙⵙⴻⵇⴷⴰⵛ ⵉ ⵓⵙⵙⵉⴷⵔⴻⵎ (ⵜⴰⵎⵡⵉⵍ) ⵏ ⵢⵉⵙⴻⵏⴼⴰⵔⴻⵏ ⵏ ⵜⵏⴻⴳⴳⴰ-ⴰ ⵢⴻⵔⵏⵓ ⵢⴻⵍⵍⴰ-ⴷ ⵡⴰⵢⴰ ⴰⴽⴽⴻⵏ ⵓⵔ ⵜⵜⵡⴰⵙⵙⴻⵇⴷⴰⵛⴻⵏ ⵢⴻⴷⵔⵉⵎⴻⵏ ⵏ ⵍⵅⴻⵣⵏⴰ ⵏ ⵓⵡⴰⵏⴰⴽ (ⴷⴰⵡⵍⴰ), ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⴰⵙⵙ ⴱⴻⵏⵙⴰⵧⵓⵍⴰ ⴰⵢ ⴷ-ⵉⵡⴻⴽⴽⴷⴻⵏ ⴷⴰⵖ ⴷⴰⴽⴽⴻⵏ ⵜⴰⵏⴻⴳⴳⴰ-ⴰ ⵓⵔ ⵜⴻⵍⵍⵉ ⴷ ⵜⴰⵄⴽⴻⵎⵜ ⵖⴻⴼ ⵍⵅⴻⵣⵏⴰ ⵏ ⵓⵡⴰⵏⴰⴽ, ⵡⴰⵏⴰⴳ ⴷ ⵜⴰⵖⴱⴰⵍⵓⵜ ⴰⵢ ⴷ-ⵢⴻⵙⵙⴰⴷⴰⴼⴻⵏ ⵉⴷⵔⵉⵎⴻⵏ ⵉ ⵜⴷⴰⵎⵙⴰ ⵜⴰⵖⴻⵍⵏⴰⵡⵜ.
ⵜⴰⵏⴻⴳⴳⴰ-ⴰ ⵜⴻⵜⵜⴰⴵⴵⴰ ⵉⵍⴻⵎⵥⵉⵢⴻⵏ ⴰⴷ ⵙⴼⴻⵄⵍⴻⵏ ⵉⵙⴻⵏⴼⴰⵔⴻⵏ-ⵏⵙⴻⵏ ⵙ ⵍⴻⵎⵄⴰⵡⵏⴰ ⵏ ⵓⵡⴻⵀⵀⵉ, ⵎⴰⵛⴰ ⵓⵔ ⵜⴻⵏ-ⵜⴻⵜⵜⵄⴰⵡⴰⵏ ⵙ ⵢⴻⴷⵔⵉⵎⴻⵏ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ. ⵙ ⵡⴰⵢⴰ, ⵜⴰⵏⴻⴳⴳⴰ-ⴰ ⵜⴻⵜⵜⴰⴽⴼ ⵉ ⵢⵉⵍⴻⵎⵥⵉⵢⴻⵏ ⴰⴽⴰⵜⴰⵔ (ⵉⵟⴰⵔ) ⵉⴳⴻⵔⵔⵣⴻⵏ ⵏ ⵓⵅⴻⴷⴷⵉⵎ, ⴰⵎ ⵡⴰⴽⴽⴻⵏ ⴰⵢ ⴰⵙⴻⵏ-ⵜⴻⵜⵜⴰⴽⴼ ⵜⵜⴰⵡⵉⵍⴰⵜ ⴰⵢ ⵃⵡⴰⵊⴻⵏ, ⵍⴰⴷⵖⴰ ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵜⵉⵙⵏⴰⵜⵡⵉⵍⵉⵏ ⵏ ⵓⵙⵙⴻⵍⵖⵓ ⴷ ⵜⴻⵖⵡⴰⵍⵜ.
ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵜⴰⵎⵓⵖⵍⵉ ⴷⴻⴳ ⵢⵉⵙⵙⵓⵜⵔⴻⵏ ⵏ ⵍⴻⵎⵄⴰⵡⵏⴰ, ⵜⴻⴹⴼⴻⵔ ⵜⵏⴻⴳⴳⴰ-ⴰ ⴰⴱⵔⵉⴷ ⴷ ⴰⵎⴰⵢⵏⵓ ⴰⵢⴷⴻⴳ ⵜⴻⵙⵙⵓⴷⴷⵓⵙ ⵜⵉⵎⵍⵉⵍⵉⵢⵉⵏ ⴰⵢⴷⴻⴳ ⴷ-ⵜⴼⴻⵔⵔⴻⵏ ⵉⵙⴻⵏⴼⴰⵔⴻⵏ ⵉⵎⵅⴻⵢⵢⵔⴻⵏ.
ⵎⵉ ⴷ-ⵢⴻⵜⵜⵡⴰⴼⵔⴻⵏ ⴽⵔⴰ ⵏ ⵓⵙⴻⵏⴼⴰⵔ, ⴰⴷ ⴰⵙ-ⵢⴻⵜⵜⵓⵏⴻⴼⴽ ⵉ ⴱⴰⴱ-ⵏⵏⴻⵙ ⴰⴽⵍⵉⵙ ⵏ ⵜⵏⴻⵣⵣⵓⵜ (ⵙⵉⴵⵉⵍ ⵜⵉⴵⴰⵔⵉ) ⴷ ⵡⴻⵎⴽⴰⵏ ⴰⵢⴷⴻⴳ ⴰⴷ ⵢⴻⵣⵎⴻⵔ ⴰⴷ ⵢⴻⵅⴷⴻⵎ ⵖⴻⴼ ⵓⵙⴻⵏⴼⴰⵔ-ⵏⵏⴻⵙ ⴷⴻⴳ ⵡⴻⴼⵔⴰⴳ ⴰⵙⵏⴰⵜⵡⵉⵍⴰⵏ ⵏ ⵜⴻⵕⵎⵉⵙⵜ-ⴰ.
