Asebter amenzawi

Yeckeṛ-d wenmahal akamruni dduṛ n Lezzayer deg lebni n talwit deg Tefriqt

LEZZAYER TAMANEɣT– Yeckeṛ-d wenmahal (safir) akamruni deg Lezzayer Tamaneɣt, Claude Joseph M’Bafou, ass n laṛebɛa deg Lezzayer Tamaneɣt, dduṛ n Ldzayer deg lebni n talwit d tɣellist (amn) deg Tefriqt, am wakken ay d-iwekked dakken iduba n Lezzayer semman-d cceṛ s yisem-nnes yernu wten-d deg-s.

« Attekki n Lezzayer deg lebni n talwit d tɣellist deg Tefriqt d iseɣ i tmurt-a ladɣa imi Lezzayer ur tcuḥḥ i wussisen (maǧhudat) akken ad teḍmen arkad deg tmura ay d-yezzin fell-as d Tefriqt s umata », ɣef wakken ay d-yenna Mass M’Bafou deg yiwet n tinawt i lmend n wesfugel (iḥtifal) s Wass n Tefriqt deg Lezzayer s weḥdaṛ n uneɣlaf n tɣawsiwin n wezɣar, Ramtane Lamamra.

« Ccwi imi ay tessaweḍ Lezzayer ad tesriḥ, ad d-tsemmi yernu ad d-tekcef cceṛ », ɣef wakken ay d-yenna wemɣar n yidiplumatiyen ifriqiyen ay d-icekṛen daɣ « aɛewwel n yiɣfawen n yiwanaken d yinabaḍen ifriqiyen » imi ay fkan azal i yizerfan n wemdan, ladɣa izerfan n tmeṭṭut.

« Ass-a, tezmer ad tzuxx Tdukli Tafriqit s ussejhed n udabu-nnes ama deg wenrar afriqi, meḥsub sdat tsuda tifriqiyin niḍen, ama deg wenrar agraɣlan », ɣef wakken ay d-yenna.

Asfugel n Wass n Tefriqt yeɣli-d d umulli wis 53 n westenyi, deg 25 Mayu 1963, n yemtawayen (ittifaqat) n Tdukli Tafriqit yernu dduṛ n wesfugel-a d « amqarab gar yiɣerfan ifriqiyen », ɣef wakken ay d-yesmekti wenmahal akamruni.