Asebter amenzawi

Yessefk ad tkemmel Tdukli Tafriqit axeddim i uferru n taluft deg Libya (Brahimi)

LEZZAYER TAMANEƔT– Yenna-d uneɣlaf aqbur n tɣawsiwin n wezɣar, Lakhdar Brahimi, ass n laṛebɛa deg Lezzayer Tamaneɣt, dakken Tadukli Tafriqit yessefk ad tkemmel axeddim i uferru n taluft deg Libya.

« Tessaweḍ Tdukli Tafriqit taɣect-nnes ama deg temnaḍt, ama deg umaḍal, deg wayen yerzan taɣdemt (ɛadala) tagraɣlant yernu yessefk ad tkemmel axeddim ladɣa deg wayen yerzan taluft n Libya », ɣef wakken ay d-yenna Mass Brahimi deg tgermant-nnes (mudaxala) i lmend n wesfugel n Wass n Tefriqt deg Lezzayer Tamaneɣt.

D acu kan, « ur yessefk ad necceḍ yernu ad nɣil dakken yewweḍ umaḍal ɣer teɣdemt tagraɣlant n tidet. Ula d yiwet n tmurt ur d-tessemlal iferdisen yessefken akken ad tettwaḥseb s tidet d tamurt n yizerfan n wemdan », ɣef wakken ay d-yenna Mass Brahimi yellan daɣ d amaslaḍ (ɛuḍw) deg Useqqamu n Yimasnagen n Tdukli Tafriqit.

Deg 2011, deg ccwal-nni n tnekra taɣerfant mgal uselway Maamar El Gueddafi, gan-d Yeɣlanen Yeddukklen taneɣtust (qarar) yefkan ttesriḥ i tegrawt n tmura yettekkan deg Temsisit Taṭlasit akken ad sqedcent iɣil aserdasan yettwalessesen (maḥdud) i uḥuddu n yimezdaɣen iɣarimen n Libya.

D acu kan, yenna-d Mass Brahimi, s wesḥissef, dakken tamuɣli-a n « tmasit (mas’uliyya) n uḥuddu » ay d-yettwabedren deg Useqqamu n Tɣellist n Yeɣlanen Yeddukklen tettwasseqdec i « ussedrem n Libya ».

S waya, Tafriqt tesɛa ttawil ayyes ad d-tessken taɣect-nnes yernu wa d Arkawal (mitaq) Afriqi n Yizerfan n Wemdan d Yiɣerfan ay d-yettwaheyyan 35 n yiseggasen aya, yernu yessefk ad tt-id-sseknen yemḍebbren ifriqiyen i umaḍal, ɣef wakken ay d-yenna Mass Brahimi.