Asebter amenzawi

Ait Djoudi yebɣa ad yernu ad yeqqim deg Meṛṛuk

RRBAṬ- Yenna-d wesleɣmay adzayri, Azzedine Ait Djoudi (ay la yesleɣmayen taɣlamt tameṛṛukit n MC Wejda), ass n lexmis, dakken yebɣa ad ikemmel axeddim d teɣlamt-a deg tsemhuyt (mawsim) ay d-yetteddun, ula ma taɣlamt-a ur izad umecwaṛ-nnes deg telɣuɣa tameṛṛukit.

« Smenyafeɣ ad rnuɣ ad qqimeɣ aseggas niḍen deg teɣlamt-a, maca, deg tcirḍart, acemma ur yeḍmin yernu kullec yezmer ad yeḍru. Iswi-inu amezwaru d assukkes n Wejda seg uɣelluy ɣer temɣunt tis snat, sakkin ad nqeṣṣer ɣef yimal-inu. Deg tidet, bɣiɣ ad kemmleɣ amecwaṛ d teɣlamt-a », ɣef wakken ay d-yenna Ait Djoudi deg udeg n Al Koora.

Sin wussan uqbel ma tfuk telɣuɣa n Meṛṛuk, MC Wejda teḍḍef amkan wis 14 deg usettef s 4 n tenqiḍin, yernu d nettat ay d taɣlamt uqbel tneggarut imi ala taɣlamt n Moghreb n Fas ay yellan deffir-s.

Deg sin n wussan ineggura n telɣuɣa, imariren n Ait Djoudi ad mmagren US Ṭanja (d tis 3 n usettef) ay la yesleɣmay wesleɣmay adzayri Abdelhak Benchikha, sakkin ad uraren mgal teɣlamt tamezwarut deg usettef, Fus Rrbaṭ.

Asleɣmay aqbur n Yilemẓiyen Inaddalen n Leqbayel yuki s lewɛaṛa n ccɣel-nnes ladɣa imi taɣlamt n Wejda attan ɣef ssebba akken ad teɣli seg temɣunt tamezwarut.

« Ad nqabel Ṭanja yebɣan ad teḥrez amkan-nnes wis 3, sakkin ad nqabel taɣlamt tamezwarut deg usettef ay yebɣan ad terbeḥ deg telɣuɣa. Aya ad yili yewɛeṛ aṭas, maca ad nennaɣ am yirran akken ad neḥrez amkan-nneɣ deg temɣunt tamezwarut ».