Asebter amenzawi

Taɣerdayt: aḥbas n 3 n medden aydeg cikken ttekkan deg uneɛruḍ n txazzabit n Krechba

TAƔERDAYT – Kraḍ-nni n yemdanen aydeg yella ccek ttekkan deg uneɛruḍ n txazzabit taremmaɣt n Meɣres yezrin deg lluzin n lgaz n Krechba (200 n yikilumitren deg wenẓul n Lemniɛa), yeḥbes-iten yemwekkel n tegduda n wexxam n ccṛeɛ n Lemniɛa, ɣef wakken ay aɣ-d-txebber yiwet n teɣbalut (maṣdar) n teɣdemt ass n lexmis tameddit.

Deffir ma slan-asen deg wexxam n ccṛeɛ, ttwaḥebsen kraḍ-a n yemdanen izedɣen deg Lemniɛa s ttehmat n uttekki deg lecɣal n tegrawt taremmaɣt (irhabiyya), akcaf n telɣa (maɛlumat) ɣef wemkan aydeg xeddmen lgaz d tuṣṣra n ccɣel n ussefsed ur d-kcifen i yimeẓla n tɣellist, aneɛruḍ n tmenɣiwt d uttekki deg lecɣal n ussefsed, ɣef wakken ay aɣ-d-txebber teɣbalut-a.

Ttwasdenben daɣ yemdanen-a ɣef uneɛruḍ n ussedrem n wayla n wiyaḍ, asseqdec n yifarisen (mawad) n ussedrem yettwagedlen (mamnuɛa) d waǧaw d usseqdec n leslaḥ n wemgaru war ttesriḥ.

Yella ccek dakken imdanen-a qqnen ɣer lecɣal iremmaɣen, ladɣa aneɛruḍ-nni n txazzabit mgal lluzin n lgaz ay la tettɣellit Sonatrach d yecriken iwerdaniyen (aǧanib), ɣef wakken ay d-tenna teɣbalut-a.

Lluzin-a la tt-tettɣellit Sonatrach d teṛmisin n British Petroleum d Statoil. Ḥukṛen-tt yiremmaɣen ass n 18 Meɣres yezrin akken ad tt-sṭerḍqen, maca ccwi imi ur d-telli lexṣara la deg tmeddurin wala deg ttawil.