ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴰⵙⵙⴻⵊⵀⴻⴷ ⵏ ⵓⵙⵙⵉⵡⴻⴹ ⵏ ⵡⴰⵎⴰⵏ ⵏ ⵜⵉⵙⵙⵉⵜ ⵉ ⵡⵓⴳⴰⵔ ⵏ 40.000 ⵏ ⵢⵉⵎⴻⵣⴷⴰⵖⴻⵏ ⴷⴻⴳ ⵜⴱⴰⵜⴻⵏⵜ

ⵜⴰⴱⴰⵜⴻⵏⵜ – ⵢⴻⵏⵏⴰ-ⴷ ⵓⵏⴻⵎⵀⴰⵍ ⵏ ⵜⴻⵖⴱⵓⵍⴰ ⵏ ⵡⴰⵎⴰⵏ ⵏ ⵜⵡⵉⵍⴰⵢⵜ ⵏ ⵜⴱⴰⵜⴻⵏⵜ, ⴰⴱⴷⴻⵍⴽⴰⵔⵉⵎ ⵛⵀⴻⴱⵔⵉ, ⴰⵙⵙ ⵏ ⵍⴻⵅⵎⵉⵙ, ⴷⴰⴽⴽⴻⵏ ⴰⴷ ⵢⴻⵜⵜⵡⴰⵙⵙⴻⵊⵀⴻⴷ ⵓⵙⵙⵉⵡⴻⴹ ⵏ ⵡⴰⵎⴰⵏ ⵉ ⵡⵓⴳⴰⵔ ⵏ 40.000 ⵏ ⵢⵉⵎⴻⵣⴷⴰⵖⴻⵏ ⵉⵣⴻⴷⵖⴻⵏ ⴷⴻⴳ ⵜⵖⵉⵡⴰⵏⵉⵏ ⵢⴻⵎⴳⴻⵔⵔⴰⴷⴻⵏ ⵏ ⵜⵡⵉⵍⴰⵢⵜ ⵏ ⵜⴱⴰⵜⴻⵏⵜ.

ⵉ ⵍⵎⴻⵏⴷ ⵏ ⵡⴰⵢⴰ, ⵉⴼⵓⴽ, ⵙⴻⴳ ⵎⴻⵍⵎⵉ ⴽⴰⵏ, ⵍⴻⴱⵏⵉ ⵏ ⵢⵉⵡⴻⵏ ⵏ ⵍⴱⵓⵕⵊ ⵏ ⵡⴰⵎⴰⵏ ⵏ 5.000 ⵏ ⵢⵉⵎⵉⵜⵔⴻⵏ ⵉⴳⴰⵙⴰⵙⴻⵏ (ⵎ3) ⵢⴻⵔⵏⵓ ⴷ ⴰⵢⴰ ⴰⴷ ⵉⴹⴻⵎⵏⴻⵏ ⴰⴼⵔⴰⵇ ⵏ ⵡⴰⵎⴰⵏ ⴳⴰⵔ 4 ⴷ 5 ⵏ ⵜⵙⴰⵄⵜⵉⵏ ⴷⴻⴳ ⵡⴰⵙⵙ ⵉ ⵢⵉⵎⴻⵣⴷⴰⵖⴻⵏ ⵏ ⵜⴻⵎⴷⵉⵏⵜ ⵜⴰⵎⴰⵢⵏⵓⵜ ⵏ ⵀⴰⵎⵍⴰ (ⵜⴰⵖⵉⵡⴰⵏⵜ ⵏ ⵡⴰⴷ ⵛⵛⴻⵄⴱⴰ) ⵢⴻⵍⵍⴰⵏ, ⵏⴰⵇⴰⵍ, ⵜⴻⵙⵄⴰ ⴰⵎⴰⵏ 2 ⴽⴰⵏ ⵏ ⵡⵓⵙⵙⴰⵏ ⴷⴻⴳ ⴷⴷⵓⵕⵜ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵎⴰⵙⴰⵢ-ⴰ (ⵎⴰⵙ’ⵓⵍ), ⴰⵎ ⵡⴰⴽⴽⴻⵏ ⴰⵢ ⴷ-ⵉⵅⴻⴱⴱⴻⵔ ⴷⴰⴽⴽⴻⵏ ⵓⵔ ⵢⴻⵜⵜⵄⴻⴹⴹⵉⵍ ⴰⴷ ⴷ-ⵉⴼⴰⴽ ⵍⴱⵓⵕⵊ ⵏⵉⴹⴻⵏ ⵏ ⵡⴰⵎⴰⵏ ⴷⴻⴳ ⵓⵖⴰⵔⴰⵎ (ⵃⴰⵢⵢ) ⵏ ⴽⴻⵛⵀⵉⴷⴰ ⴰⵏⴷⴰ ⴰⴷ ⵢⴻⵜⵜⵡⴰⴽⴽⴻⵙ ⴰⴽⴽ ⵡⵓⴳⵓⵔ ⵏ ⵍⴻⵅⵚⴰⵚ ⵏ ⵡⴰⵎⴰⵏ.

ⴷⴰⵖ, ⴰⴼⴰⴽⵉ ⵏ ⵓⵊⴻⵄⴱⵓⴱ ⴰⴳⴻⵊⴷⴰⵏ ⵏ ⵓⵙⵙⵉⵡⴻⴹ ⵏ ⵡⴰⵎⴰⵏ ⵏ ⵜⵉⵙⵙⵉⵜ ⵖⴻⵔ ⴷⴻⵛⵕⴻⵜ ⵀⴰⵎⴰⵔⴰ (ⵙⴷⴰⵜ ⴰⵔⵔⵉⵙ) ⴷ ⴰⵢⴻⵏ ⴰⴷ ⵉⴼⴰⴽⴻⵏ ⵓⴳⵓⵔ ⵏ ⵡⴻⵏⴳⴰⵢ ⴷ ⵍⴻⵅⵚⴰⵔⴰ ⵏ ⵡⴰⵎⴰⵏ ⵢⴻⵡⵡⴹⴻⵏ ⵖⴻⵔ 70% ⵙⴻⴳ ⵡⴰⵎⴰⵏ ⴰⵢ ⵢⴻⵜⵜⵡⴰⴼⵔⴰⵇⴻⵏ, ⵢⴻⵔⵏⵓ ⵢⴻⵙⵇⴰⵎ-ⴷ ⵓⵙⴻⵏⴼⴰⵔ-ⴰ 3,5 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⴷⵉⵏⴰⵕⴻⵏ.

ⴰⴷ ⴷ-ⵡⴻⵊⴷⴻⵏ ⴷⴰⵖ ⵙⵉⵏ ⵏ ⵍⴻⴱⵕⵓⵊ ⵏ ⵡⴰⵎⴰⵏ ⵓⵇⴱⴻⵍ ⵎⴰ ⵢⴻⴱⴷⴰ-ⴷ ⵡⴰⵢⵢⵓⵔ ⵏ ⵔⴻⵎⴹⴰⵏ, ⵢⴻⵔⵏⵓ ⵡⵉ ⴷ ⵍⴱⵓⵕⵊ ⵏ 300 ⵏ ⵢⵉⵎⵉⵜⵔⴻⵏ ⵉⴳⴰⵙⴰⵙⴻⵏ (ⵎ3) ⴷⴻⴳ ⵛⵛⵉⵔ, ⴷ ⵍⴱⵓⵕⵊ ⵏ 500 ⵏ ⵢⵉⵎⵉⵜⵔⴻⵏ ⵉⴳⴰⵙⴰⵙⴻⵏ (ⵎ3) ⴷⴻⴳ ⵜⴰⴱⴰⵏⴷⵓⵜ, ⵢⴻⵔⵏⵓ ⵍⴻⴱⵕⵓⵊ-ⴰ ⴰⴷ ⴼⴻⵔⵔⵇⴻⵏ ⴰⵎⴰⵏ ⵉ ⵡⴰⵣⴰⵍ ⵏ 4.000 ⵏ ⵢⵉⵎⴻⵣⴷⴰⵖⴻⵏ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵉⵅⴻⴱⴱⴻⵔ ⵓⵎⴰⵙⴰⵢ-ⴰ ⴰⵢ ⴷ-ⵉⵡⴻⵊⵊⴷⴻⵏ ⴷⴰⴽⴽⴻⵏ ⴰⴽⴽ ⵉⵊⴻⵄⴱⵓⴱⴻⵏ ⵢⴻⵔⵔⵥⴻⵏ (ⴳⴰⵔ-ⴰⵙⴻⵏ ⵓⵍⴰ ⴷ ⵡⵉⴷ ⵏ ⵡⴻⵙⵙⵡⴰⵢ ⵏ ⵡⴰⴽⴰⵍ ⵏ ⵜⴽⴻⵔⵔⴰⵣⵜ) ⵜⵜⵡⴰⵚⴻⴳⴳⵎⴻⵏ.

ⴷⴻⴳ ⵜⴻⵔⵣⵉ-ⵏⵏⴻⵙ ⵖⴻⴼ ⵜⵖⵉⵡⴰⵏⵉⵏ ⵏ ⴰⵔⵔⵉⵙ ⴷ ⵉⵛⵎⵓⵍ ⴷⴻⴳ ⵜⵍⴻⵎⵎⴰⵙⵜ ⵏ ⵎⴰⵢⵓ ⵢⴻⵣⵔⵉⵏ, ⵉⵃⴻⵜⵜⴻⵜ-ⴷ ⵓⵡⴰⵍⵉ ⵖⴻⴼ ⵓⴼⴰⴽⵉ ⵏ ⵢⵉⵙⴻⵏⴼⴰⵔⴻⵏ ⵏ ⵡⴻⵃⵔⵉⵛ ⵏ ⵡⴰⵎⴰⵏ ⵓⵇⴱⴻⵍ ⵎⴰ ⵢⴻⴱⴷⴰ-ⴷ ⵔⴻⵎⴹⴰⵏ, ⴰⵎ ⵡⴰⴽⴽⴻⵏ ⴰⵢ ⴷ-ⵉⵡⴻⴽⴽⴻⴷ ⴷⴰⴽⴽⴻⵏ ⵎⴰⵣⴰⵍ ⵍⴰ ⵢⴻⵜⵜⴽⴻⵎⵎⵉⵍ ⵓⵅⴻⴷⴷⵉⵎ ⵉ ⵓⵙⵙⵉⵡⴻⴹ ⵏ ⵡⴰⵎⴰⵏ ⵖⴻⵔ ⵡⴰⴽⴽ ⵉⵎⴻⵣⴷⴰⵖⴻⵏ ⵏ ⵜⵡⵉⵍⴰⵢⵜ, ⵍⴰⴷⵖⴰ ⵡⵉⴷ ⵏ ⵜⴻⵎⵏⴰⴹⵉⵏ ⵜⵓⵄⵣⵉⵍⵉⵏ.