ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵜⵉⴱⴻⵙⴽⴻⵔⵜ: ⴰⵙⵙⴻⴷⵔⴻⵎ ⵏ ⵓⵥⴻⴹⴹⴰ ⴰⵖⴻⵍⵏⴰⵡ ⵢⴻⵙⵏⵓⵣⵓⵢⴻⵏ ⴰⴽⴰⵍ ⵏ ⵜⴽⴻⵔⵔⴰⵣⵜ ⴱⴻⵕⵕⴰ ⵉ ⵍⵇⴰⵏⵓⵏ

ⵜⵉⴱⴻⵙⴽⴻⵔⵜ – ⵙⴷⴻⵔⵎⴻⵏ ⵢⵉⵎⴻⵥⵍⴰ (ⵎⴰⵚⴰⵍⵉⵃ) ⵏ ⵜⵖⴻⵍⵍⵉⵙⵜ (ⴰⵎⵏ) ⵏ ⵜⵡⵉⵍⴰⵢⵜ ⵏ ⵜⴱⴻⵙⴽⴻⵔⵜ ⵢⵉⵡⴻⵏ ⵏ ⵓⵥⴻⴹⴹⴰ ⵏ 8 ⵏ ⵢⴻⵎⴷⴰⵏⴻⵏ ⵢⴻⵜⵜⴻⴽⴽⴰⵏ ⴷⴻⴳ ⵍⴻⵛⵖⴰⵍ ⵢⴻⵎⴳⴻⵔⵔⴰⴷⴻⵏ ⵢⴻⴼⴼⵖⴻⵏ ⵉ ⵍⵇⴰⵏⵓⵏ ⴷⴻⴳ ⵓⵙⵙⴻⵏⵣⵉ ⵏ ⵡⴰⴽⴰⵍ ⵏ ⵜⴽⴻⵔⵔⴰⵣⵜ, ⵖⴻⴼ ⵡⴰⴽⴽⴻⵏ ⴰⵢ ⴰⵖ-ⴷ-ⵉⵅⴻⴱⴱⴻⵔ ⵢⴻⵎⴽⴻⵍⵍⴻⴼ ⵏ ⵜⴻⵖⵡⴰⵍⵜ ⵏ ⵜⵖⴻⵍⵍⵉⵙⵜ ⴰⵙⵙ ⵏ ⵍⵃⴻⴷⴷ.

ⵢⴻⵏⵏⴰ-ⴰⵖ-ⴷ ⵢⴻⵎⴽⴻⵍⵍⴻⴼ-ⴰ ⴷⴰⴽⴽⴻⵏ ⵉⵎⴷⴰⵏⴻⵏ-ⴰ ⵍⵍⴰⵏ ⵙⵙⵓⵎⵓⵔⴻⵏ-ⴷ (ⵢⴰⵇⵜⴰⵔⵉⵃⵓⵏ) ⵍⴻⵎⵄⴰⵡⵏⴰ ⵉ ⵜⵎⴻⵙⵖⵉⵡⵜ ⵏ ⵡⴰⴽⴰⵍ ⵏ ⵜⴽⴻⵔⵔⴰⵣⵜ, ⵎⴰⵛⴰ ⵍⵍⴰⵏ ⵙⵙⵓⵜⵓⵔⴻⵏ ⵙⴻⴳ ⵢⴻⵎⴷⴰⵏⴻⵏ ⵓⵎⵉ ⵜⵜⴽⴻⵍⵍⵉⵅⴻⵏ ⴰⴷ ⴷ-ⵅⴻⵍⵍⵚⴻⵏ 400 000 ⵏ ⵢⵉⴷⵉⵏⴰⵕⴻⵏ ⴰⴽⴽⴻⵏ ⴰⴷ ⴰⵙⴻⵏ-ⵙⵄⴻⴷⴷⵉⵏ ⵉⴽⴰⵔⴰⵎⴻⵏ-ⵏⵙⴻⵏ (ⵎⵉⵍⴰⴼⴼⴰⵜ).

ⵉⵃⵜⴰⵛⴻⵏ ⴰⵢ ⵜⴳⴰ ⵜⴻⵎⵙⵓⵍⵜⴰ (ⵛⵓⵔⵟⴰ) ⵜⴰⵖⴻⴷⵎⴰⵏⵜ (ⵇⴰⴹⴰ’ⵉⵢⵢⴰ) ⴽⴻⵛⴼⴻⵏ-ⴷ ⴷⴰⴽⴽⴻⵏ ⵉⵎⴷⴰⵏⴻⵏ-ⴰ ⵢⴻⵜⵜⵡⴰⴹⴹⴼⴻⵏ ⵙⵇⴻⴷⵛⴻⵏ ⵍⴻⴽⵡⴰⵖⴻⴹ ⵉⴷⴻⵖⵍⴻⵏ ⵢⴻⵔⵏⵓ ⵙⵙⴻⵔⵙⴻⵏ-ⵜⴻⵏ ⴷⴻⴳ ⵢⵉⵎⴻⵥⵍⴰ ⴰⵢ ⵜⴻⵔⵣⴰ ⵜⴻⵎⵙⴰⵍⵜ ⴰⴽⴽⴻⵏ ⴰⴷ ⵙⵜⴻⵄⵕⴼⴻⵏ ⵙ ⵡⴰⴽⴰⵍ-ⵏⵏⵉ ⵢⴻⵏⵣⴰⵏ ⴰⵎⵣⵓⵏ ⵢⴻⵏⵣⴰ ⵙ ⵍⵇⴰⵏⵓⵏ, ⵖⴻⴼ ⵡⴰⴽⴽⴻⵏ ⴰⵢ ⴰⵖ-ⴷ-ⵙⴼⴻⵀⵎⴻⵏ.

ⵉⵎⴷⴰⵏⴻⵏ-ⴰ, ⵢⴻⵙⵄⴰⵏ ⴳⴰⵔ 27 ⴷ 58 ⵏ ⵢⵉⵙⴻⴳⴳⴰⵙⴻⵏ, ⵙⵇⴻⴷⵛⴻⵏ ⵉⵙⵎⴰⵡⴻⵏ ⵏ ⵜⴽⴻⵍⵍⴰⵅ ⴷⴻⴳ ⵍⴻⴽⵡⴰⵖⴻⴹ-ⵏⵏⵉ ⵉⴷⴻⵖⵍⴻⵏ, ⵢⴻⵔⵏⵓ ⵙⵙⴰⵡⴹⴻⵏ ⴰⴷ ⴰⴽⵔⴻⵏ 18 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⴷⵉⵏⴰⵕⴻⵏ ⵙⴻⴳ 42 ⵏ ⵢⴻⵎⴷⴰⵏⴻⵏ ⵢⴻⵜⵜⵡⴰⴽⴻⵍⵍⵅⴻⵏ.

ⴳⴰⵔ ⵢⴻⵎⴷⴰⵏⴻⵏ ⵢⴻⵜⵜⴻⴽⴽⴰⵏ ⴷⴻⴳ ⵓⵥⴻⴹⴹⴰ-ⴰ, ⵢⴻⵍⵍⴰ ⵢⵉⵡⴻⵏ ⴷ ⴰⵅⴻⴷⴷⴰⵎ ⴷⴻⴳ ⵡⴻⵅⵅⴰⵎ ⵏ ⵡⴰⴽⴰⵍ, ⵢⵉⵡⴻⵏ ⴷ ⴱⴰⴱ ⵏ ⵜⵏⴻⵖⵍⵓⵙⵜ (ⵎⴰⵇⵀⴰ) ⵏ ⵉⵏⵜⴻⵔⵏⴻⵜ, ⵎⴰ ⴷ ⵢⵉⵡⴻⵏ ⴷ ⴰⵎⴻⵏⵣⴰⴳ (ⵎⴰⵙⵙⴰⵃ), ⵢⴻⵔⵏⵓ ⵣⴻⴷⵖⴻⵏ ⴷⴻⴳ ⵜⴱⴻⵙⴽⴻⵔⵜ, ⵜⴰⴱⴰⵜⴻⵏⵜ, ⵇⵙⴻⵏⵟⵉⵏⴰ ⴷ ⵓⵎ ⵍⴻⴱⵡⴰⵇⵉ.