ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵉⴼⵓⴽ ⵓⵏⴻⵖⵍⴰⴼ ⴰⵎⴻⵏⵣⵓ ⵜⵉⵔⵣⵉ-ⵏⵏⴻⵙ ⵖⴻⴼ ⵜⵡⵉⵍⴰⵢⵜ ⵏ ⵜⵉⵣⵉ ⵡⴻⵣⵣⵓ

ⵜⵉⵣⵉ ⵡⴻⵣⵣⵓ– ⵉⴼⵓⴽ ⵓⵏⴻⵖⵍⴰⴼ ⴰⵎⴻⵏⵣⵓ ⴰⴱⴷⴻⵍⵎⴰⵍⴻⴽ ⵙⴻⵍⵍⴰⵍ, ⴰⵙⵙ ⵏ ⵍⵃⴻⴷⴷ, ⵜⵉⵔⵣⵉ-ⵏⵏⴻⵙ ⵖⴻⴼ ⵜⵡⵉⵍⴰⵢⵜ ⵏ ⵜⵉⵣⵉ ⵡⴻⵣⵣⵓ ⵙ ⵡⴻⵎⵢⴰⴳⴻⵔ ⴷ ⵢⴻⵎⵙⴻⴼⵜⵉⵢⴻⵏ ⵏ ⵜⵡⵉⵍⴰⵢⵜ-ⴰ ⴷⴻⴳ ⵜⵣⴻⵇⵇⴰ ⵏ ⵡⴰⴷⴷⴰⵍ ⵜⴰⴳⵜⴰⵣⴰⵍⵜ ⵏ ⵓⵙⴰⵔⵉⵔ (ⵎⴰⵍⵄⴰⴱ) ⵏ 1ⵓ ⵏ ⵡⴻⵎⴱⴻⵔ.

ⵉⵡⴻⴽⴽⴻⴷ-ⴷ ⵓⵏⴻⵖⵍⴰⴼ ⴰⵎⴻⵏⵣⵓ ⵉ ⵡⵉⴷ ⵉⵃⴻⴷⵕⴻⵏ ⴷⴰⴽⴽⴻⵏ ⴰⵡⴰⵏⴰⴽ (ⴷⴰⵡⵍⴰ) ⵢⴻⵙⵙⴻⴱⵖⴰⵙ ⵢⴻⵔⵏⵓ ⵢⴻⵜⵜⵄⴰⵡⴰⵏ ⴰⵙⵙⴻⴼⵜⵉ ⵓⵙⵍⵉⴳ ⴰⴽⴽⴻⵏ ⴰⴷ ⵢⴻⵜⵜⴻⴽⴽⵉ ⴷⴻⴳ ⵡⴻⵙⴵⵓⴵⴵⴻⴳ ⴷ ⵓⵏⴻⵡⵡⴻⵄ ⵏ ⵜⴷⴰⵎⵙⴰ ⵜⴰⵖⴻⵍⵏⴰⵡⵜ.

«ⵓⵔ ⵏⴻⵍⵍⵉ ⵎⴳⴰⵍ ⵡⵉⴷ ⵢⴻⴱⵖⴰⵏ ⴰⴷ ⵔⴻⴱⵃⴻⵏ ⵉⴷⵔⵉⵎⴻⵏ. ⵏⴻⵛⵔⴻⴹ-ⴷ ⴽⴰⵏ ⴰⴷ ⵜⵜⵡⴰⵅⴻⴷⵎⴻⵏⵜ ⵜⵖⴰⵡⵙⵉⵡⵉⵏ ⵙ ⵡⴻⴱⵔⵉⴷ ⴰⴼⵔⴰⵡⴰⵏ (ⵛⴰⴼⴼⴰⴼ) », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ.

ⵉⵡⴻⴽⴽⴻⴷ-ⴷ ⵓⵏⴻⵖⵍⴰⴼ ⴰⵎⴻⵏⵣⵓ, ⴷⴻⴳ ⵡⴻⵎⵢⴰⴳⴻⵔ-ⴰ, ⴷⴰⴽⴽⴻⵏ ⵜⴰⵡⵉⵍⴰⵢⵜ ⵏ ⵜⵉⵣⵉ ⵡⴻⵣⵣⵓ ⵜⴻⵙⵄⴰ ⵜⵉⵣⴻⵎⵎⴰⵔ ⴷ ⵜⵉⵎⴻⵇⵔⴰⵏⵉⵏ ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵜⵉⵖⴱⵓⵍⴰ ⵜⴰⵍⵙⴰⵏⵉⵏ (ⵎⴰⵡⴰⵔⵉⴷ ⴱⴰⵛⴰⵔⵉⵢⵢⴰ) ⴷ ⵜⴳⴰⵎⴰⵏⵉⵏ, ⵢⴻⵔⵏⵓ ⵜⴻⵣⵎⴻⵔ ⴰⴷ ⵜⴻⵜⵜⴻⴽⴽⵉ, ⵙ ⵡⴰⵢⴰ, ⴷⴻⴳ ⵓⵙⵙⵉⴷⴻⴼ ⵏ ⵜⴻⴷⵔⵉⵎⵜ ⵉ ⵜⴷⴰⵎⵙⴰ ⵏ ⵜⵎⵓⵔⵜ.

ⵜⵉⵣⴻⵎⵎⴰⵔ-ⴰ ⴼⴼⵔⴻⵏⵜ ⵍⴰⴷⵖⴰ ⴷⴻⴳ ⵢⴻⵃⵔⵉⵛⴻⵏ ⵏ ⵜⵎⴻⵔⵔⵉⵜ (ⵙⵉⵢⴰⵃⴰ) ⴷ ⵜⴽⴻⵔⵔⴰⵣⵜ, ⴰⵎ ⵡⴰⴽⴽⴻⵏ ⴰⵢ ⵜⴻⵙⵄⴰ ⵜⵡⵉⵍⴰⵢⵜ-ⴰ ⴰⵟⴰⵙ ⵏ ⵢⵉⵅⴻⴷⴷⴰⵎⴻⵏ ⵉⵥⴻⵡⵔⴻⵏ ⴷⴻⴳ ⵚⵚⴻⵏⵄⴰ.

ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵜⴰⴽⴻⵔⵔⴰⵣⵜ, ⵢⴻⵏⵏⴰ-ⴷ ⵎⴰⵙⵙ ⵙⴻⵍⵍⴰⵍ ⴷⴰⴽⴽⴻⵏ ⵜⵉⵣⵉ ⵡⴻⵣⵣⵓ ⵜⴻⵣⵎⴻⵔ ⴰⴷ ⵜⵓⵖⴰⵍ ⴰⴷ ⵜⴻⵙⵙⴰⴵⴰⵡ ⴰⵟⴰⵙ ⵏ ⵍⵖⴻⵍⵍⴰⵜ.

« ⵉⵙⵡⵉ-ⵏⵏⴻⵖ ⵉ 2019 ⵏⴻⵜⵜⴰ ⴷ ⴰⵙⵙⵉⵡⴻⴹ ⵏ ⵜⵡⵉⵍⴰⵢⵜ-ⴰ ⴰⴽⴽⴻⵏ ⴰⴷ ⵜⴻⵙⵙⴰⴵⴰⵡ, ⵎⴰ ⵓⵍⴰⵛ, ⴳⴰⵔ 15 ⴷ 20 ⵏ ⵢⵉⵎⴻⵍⵢⵓⵏⴻⵏ ⵏ ⵡⵓⵕⵓⵜⴻⵏ ⵏ ⵣⵣⵉⵜ ⵏ ⵓⵣⴻⵎⵎⵓⵔ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ.

ⴷ ⴰⵛⵓ ⴽⴰⵏ, ⵢⴻⵙⵙⴻⴼⴽ ⴰⴷ ⵜⵜⵡⴰⴽⴽⵙⴻⵏ ⴽⵔⴰ ⵏ ⵢⵉⵄⴻⵡⵡⵉⵇⴻⵏ ⵢⴻⵔⵣⴰⵏ, ⵍⴰⴷⵖⴰ, ⵜⴰⴳⴰⵢⵜ ⴰⵢ ⵍⴰ ⵜⵜⴰⴳⵉⵏ ⵢⵉⵎⴰⵡⵍⴰⵏ ⵏ ⵡⴰⴽⴰⵍ ⴰⴷ ⵜⵜⵡⴻⴱⵏⵓⵏ ⵢⵉⵙⴻⵏⴼⴰⵔⴻⵏ ⴷⴻⴳ ⵡⴰⴽⴰⵍ-ⵏⵙⴻⵏ ⴷ ⵍⴻⵅⵚⴰⵚ ⵏ ⵡⴰⴽⴰⵍ ⴰⵎⴳⵓⵔⴰⵏ (ⵚⵉⵏⴰⵄⵉ).