ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⴰⵙⵙⴻⵎⵖⴻⵔ ⵏ ⵜⵣⴻⵎⵎⴰⵔ ⵏ ⵢⴻⵎⵡⴻⴽⴽⵍⴻⵏ-ⵉⵎⵇⴻⵢⵢⵎⴻⵏ ⴰⴷ ⴷ-ⵢⴻⵙⵇⴰⵎ ⵓⴳⴰⵔ ⵏ ⵢⴻⴷⵔⵉⵎⴻⵏ ⵉ ⵓⵡⴰⵏⴰⴽ (ⵍⵧⵓⵀ)
ⵍⴷⵣⴰⵢⴻⵔ ⵜⴰⵎⴰⵏⴻⵖⵜ– ⵢⴻⵏⵏⴰ-ⴷ ⵓⵏⴻⵖⵍⴰⴼ ⵏ ⵜⴻⵖⴷⴻⵎⵜ, ⵜⴰⵢⴻⴱ ⵍⵧⵓⵀ, ⴰⵙⵙ ⵏ ⵍⴻⵜⵏⵉⵢⴻⵏ ⴷⴻⴳ ⵍⴷⵣⴰⵢⴻⵔ ⵜⴰⵎⴰⵏⴻⵖⵜ, ⴷⴰⴽⴽⴻⵏ ⴰⵙⴻⵏⴼⴰⵔ ⵏ ⵍⵇⴰⵏⵓⵏ ⵏ ⵓⵙⵙⵓⴷⴷⴻⵙ (ⵜⴰⵏⴹⵉⵎ) ⵏ ⵚⵚⴻⵏⵄⴰ ⵏ ⵢⴻⵎⵡⴻⴽⴽⴻⵍ-ⵉⵎⵇⴻⵢⵢⴻⵎ ⵢⴻⵙⴱⴰⵏ-ⴷ ⵉⵣⴻⵔⴼⴰⵏ ⴷ ⵜⵣⴻⵎⵎⴰⵔ ⵏ ⵢⵉⵅⴻⴷⴷⴰⵎⴻⵏ-ⴰ ⵢⴻⵔⵏⵓ ⵢⴻⵏⵏⴰ-ⴷ ⴷⴰⴽⴽⴻⵏ ⴰⵙⵙⴻⵎⵖⴻⵔ ⵏ ⵜⵣⴻⵎⵎⴰⵔ-ⵏⵙⴻⵏ ⴰⴽⴽⴻⵏ ⴰⴷ ⴷ-ⵃⴰⵣⴻⵏⵜ ⵉⵏⵓⵔⴰⵔ ⵏⵉⴹⴻⵏ ⴷ ⴰⵢⴻⵏ ⴰⴷ ⴷ-ⵢⴻⵙⵇⴰⵎⴻⵏ ⵓⴳⴰⵔ ⵏ ⵢⴻⴷⵔⵉⵎⴻⵏ ⵉ ⵓⵡⴰⵏⴰⴽ (ⴷⴰⵡⵍⴰ).
ⵙ ⵡⴰⵢⴰ, ⵢⴻⵏⵏⴰ-ⴷ ⵎⴰⵙⵙ ⵍⵧⵓⵀ, ⴷⴻⴳ ⵜⵔⵉⵔⵉⵜ-ⵏⵏⴻⵙ ⵉ ⵢⵉⵎⴰⵣⴰⵏⴻⵏ (ⵏⵓⵡⵡⴰⴱ) ⴷⴻⴳ ⵡⴻⵙⴽⴰⵙⵉ ⵖⴻⴼ ⵓⵙⴻⵏⴼⴰⵔ-ⴰ ⵏ ⵍⵇⴰⵏⵓⵏ, ⴷⴰⴽⴽⴻⵏ ⵍⵍⴰⵏ ⵢⴻⵃⵔⵉⵛⴻⵏ ⵏⵉⴹⴻⵏ, ⴰⵎ ⵜⴻⴷⵡⴰⵏⵜ, ⴰⵢ ⵢⴻⵙⵄⴰⵏ ⵜⵉⵣⴻⵎⵎⴰⵔ ⴰⴷ ⵙⵙⴻⵏⵣⴻⵏⵜ ⴰⵢⵍⴰ ⵏ ⵓⵡⴰⵏⴰⴽ ⵙ ⵡⵓⵔⵎⵉ (ⵎⵓⵣⴰⵢⴰⴷⴰ), ⵢⴻⵔⵏⵓ ⵢⴻⵏⵏⴰ-ⴷ ⴷⴰⴽⴽⴻⵏ « ⵍⴻⵎⵎⴻⵔ ⴰⴷ ⵢⴻⵜⵜⵓⵏⴻⴼⴽ ⵛⵛⵖⴻⵍ-ⴰ ⵉ ⵢⴻⵎⵡⴻⴽⴽⵍⴻⵏ-ⵉⵎⵇⴻⵢⵢⵎⴻⵏ, ⴰⴷ ⴷ-ⵢⴻⵙⵇⴰⵎ ⵡⴰⵢⴰ ⵉⴷⵔⵉⵎⴻⵏ ⴷ ⵉⵎⴻⵇⵔⴰⵏⴻⵏ ⵉ ⵓⵡⴰⵏⴰⴽ ».
ⵢⴻⵏⵏⴰ-ⴷ ⵓⵏⴻⵖⵍⴰⴼ ⴷⴰⴽⴽⴻⵏ ⴰⵏⴰⵡⴰⵔ ⴰⵏⴰⴳⴷⵓⴷ (ⵎⵓⵡⴰⴹⴹⴰⴼ ⵄⵓⵎⵓⵎⵉ) ⵏⴻⵖ ⴰⴷⵡⴰⵏⵉ ⵢⴻⵜⵜⴻⴳ ⵛⵛⵖⴻⵍ-ⴰ ⴷⴻⴳ ⵓⴽⴰⵜⴰⵔ ⵏ ⵓⵅⴻⴷⴷⵉⵎ-ⵏⵏⴻⵙ ⵏ ⵎⴻⵏⵡⴰⵍⴰ, ⵢⴻⵔⵏⵓ ⵎⴰⵛⵉ ⴰⴽⴽⴰ ⴰⵢ ⵢⴻⵍⵍⴰ ⵍⵃⴰⵍ ⴷ ⵢⴻⵎⵡⴻⴽⴽⴻⵍ-ⵉⵎⵇⴻⵢⵢⴻⵎ, ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵔⵏⴰ ⴷⴰⴽⴽⴻⵏ ⵉⵃⴻⵣⵣⵉⴱⴻⵏ ⴰⵢ ⵢⴻⵙⵙⴻⴼⵔⴰ ⵓⵙⴻⵏⴼⴰⵔ-ⴰ ⵏ ⵍⵇⴰⵏⵓⵏ ⴷ ⵡⵉⵏ ⵢⴻⴼⴽⴰⵏ ⵜⴰⵣⵎⴻⵔⵜ ⵉ ⵜⴻⴷⵡⴰⵏⵜ ⴷ ⵢⵉⵎⴻⵥⵍⴰ (ⵎⴰⵚⴰⵍⵉⵃ) ⵏⵉⴹⴻⵏ ⴰⴷ ⵙⵙⵓⵜⵔⴻⵏ ⵍⴻⵎⵄⴰⵡⵏⴰ ⵏ ⵢⴻⵎⵡⴻⴽⴽⴻⵍ-ⵉⵎⵇⴻⵢⵢⴻⵎ.
ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⴰⵙⵙⵓⵎⴻⵔ (ⵉⵇⵜⵉⵔⴰⵃ) ⵏ ⵓⵄⴰⵡⴻⴷ ⵏ ⵜⵎⵓⵖⵍⵉ ⴷⴻⴳ ⵡⴻⴼⵔⴰⵇ ⵏ ⵢⴻⵎⵡⴻⴽⴽⵍⴻⵏ-ⵉⵎⵇⴻⵢⵢⵎⴻⵏ ⴷⴻⴳ ⵜⴻⵎⵏⴰⴹⵉⵏ ⵢⴻⵎⴳⴻⵔⵔⴰⴷⴻⵏ ⵏ ⵜⵎⵓⵔⵜ, ⵢⴻⵏⵏⴰ-ⴷ ⵎⴰⵙⵙ ⵍⵧⵓⵀ ⴷⴰⴽⴽⴻⵏ ⵓⴳⵓⵔ-ⴰ ⵓⵔ ⵢⴻⵔⵣⵉ ⴽⴰⵏ ⵉⵎⵡⴻⴽⴽⵍⴻⵏ-ⵉⵎⵇⴻⵢⵢⵎⴻⵏ (ⴰⵢ ⵉⵅⴻⴷⴷⵎⴻⵏ ⴰⴽⴽⴻⵏ ⴰⴷ ⵄⴰⵡⵏⴻⵏ ⴰⵃⵔⵉⵛ ⵏ ⵜⴻⵖⴷⴻⵎⵜ), ⵡⴰⵏⴰⴳ ⵢⴻⵔⵣⴰ ⴷⴰⵖ ⵉⵍⵓⵙⵉⵢⴻⵏ ⴷ ⵢⵉⵣⴻⵎⵎⴰⵎⴻⵏ, ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴷⴰⴽⴽⴻⵏ ⵉⵅⴻⴷⴷⴰⵎⴻⵏ-ⴰ ⵅⵓⵚⵚⴻⵏ ⴷⴻⴳ ⵜⴻⵎⵏⴰⴹⵉⵏ ⵏ ⵡⴻⵏⵥⵓⵍ (ⴵⴰⵏⵓⴱ) ⵉⵎⵉ ⵓⵔ ⵍⵍⵉⵏⵜ ⵜⴻⵎⵙⵉⵣⵣⵍⵉⵏ ⵉ ⵡⴰⵢⴰ.
ⵉ ⵍⵎⴻⵏⴷ ⵏ ⵡⴰⵢⴰ, ⵢⴻⵏⵏⴰ-ⴷ ⵓⵏⴻⵖⵍⴰⴼ ⴷⴰⴽⴽⴻⵏ ⵢⴻⴱⴷⴰ-ⴷ ⵓⵅⴻⵎⵎⴻⵎ ⵉ ⵍⵎⴻⵏⴷ ⵏ ⵓⵙⵙⵓⴷⴷⴻⵙ ⵏ ⵚⵚⴻⵏⴼ-ⴰ ⵏ ⵜⴻⵎⵙⵉⵣⵣⵍⵉⵏ ⴷ ⵓⵏⴰⴷⵉ ⵏ ⵜⵉⴼⵔⴰⵜⵉⵏ ⵉ ⵡⵓⴳⵓⵔ ⵏ ⵓⵙⵙⵉⵍⴻⵖ (ⵜⴰⴽⵡⵉⵏ), ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⴱⴷⴻⵔ ⴷⴰⴽⴽⴻⵏ ⵢⴻⵣⵎⴻⵔ ⵍⵃⴰⵍ ⴰⴷ ⴷ-ⵉⵍⵉⵏ ⵢⴻⵎⵜⴰⵡⴰⵢⴻⵏ (ⵉⵜⵜⵉⴼⴰⵇⴰⵜ) ⴷ ⵜⴻⵙⴷⴰⵡⵉⵢⵉⵏ ⴰⴽⴽⴻⵏ ⴰⴷ ⵔⴻⵥⵎⴻⵏⵜ ⵜⵉⵎⴻⵣⵣⵓⴳⵉⵏ ⵜⵉⵎⴰⵢⵏⵓⵜⵉⵏ ⴷⴻⴳ ⵡⴻⵃⵔⵉⵛ-ⴰ ⵢⴻⵔⵏⵓ ⴰⴷ ⴷ-ⵙⵙⵉⵍⵖⴻⵏⵜ ⵉⵅⴻⴷⴷⴰⵎⴻⵏ ⴷⴻⴳ ⵢⴻⵃⵔⵉⵛⴻⵏ-ⴰ ⴷⴻⴼⴼⵉⵔ ⵜⴻⵎⵙⵉⵣⵣⴻⵍⵜ.
