ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴰⵅⵜⴰⵎ ⵏ ⵜⵎⵓⴳⴻⵔⵜ ⵜⴰⴳⵔⴰⵖⵍⴰⵏⵜ ⵜⵉⵙ 49 ⵏ ⵍⴻⵣⵣⴰⵢⴻⵔ

ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⵜⴼⵓⴽ ⵜⵎⵓⴳⴻⵔⵜ ⵜⴰⴳⵔⴰⵖⵍⴰⵏⵜ ⵜⵉⵙ 49 ⵏ ⵍⴻⵣⵣⴰⵢⴻⵔ ⴰⵙⵙ ⵏ ⵍⴻⵅⵎⵉⵙ ⴷⴻⴼⴼⵉⵔ 6 ⵏ ⵡⵓⵙⵙⴰⵏ ⵏ ⵜⵣⵉⴽⴽⴻⵏⵜ. ⵜⴰⵎⵓⴳⴻⵔⵜ-ⴰ ⵜⴻⵍⵍⴰ-ⴷ ⴷ ⵜⴰⴳⵏⵉⵜ ⵉ ⵜⴻⵕⵎⵉⵙⵉⵏ (ⵛⴰⵔⵉⴽⴰⵜ) ⵜⵉⴷⵣⴰⵢⵔⵉⵢⵉⵏ ⴷ ⵜⵡⴻⵔⴷⴰⵏⵉⵢⵉⵏ ⴰⴷ ⴷ-ⵙⵙⴻⵔⵙⴻⵏⵜ ⵙⵙⴻⵍⵄⴰ-ⵏⵙⴻⵏⵜ ⵢⴻⵔⵏⵓ ⴰⴷ ⴷ-ⵙⵙⵓⴽⴽⴻⵏⵜ ⵜⵉⵟ ⵖⴻⴼ ⵜⵉⵛⵛⵓⵔⴽⵉⵡⵉⵏ ⴷ ⵍⴻⵄⵇⵓⴷⴰⵜ ⴰⵢ ⵣⴻⵎⵔⴻⵏⵜ ⴰⴷ ⵜⴻⵏ-ⵙⵜⴻⵏⵢⵉⵏⵜ ⴳⴰⵔ-ⴰⵙⴻⵏⵜ.

ⵙ ⵓⵊⴻⵎⵎⴰⵍ, 810 ⵏ ⵜⴻⵕⵎⵉⵙⵉⵏ, ⴳⴰⵔ-ⴰⵙⴻⵏⵜ 405 ⵏ ⵜⵡⴻⵔⴷⴰⵏⵉⵢⵉⵏ ⵙⴻⴳ 33 ⵏ ⵜⵎⵓⵔⴰ, ⴰⵢ ⵢⴻⵜⵜⴻⴽⴽⴰⵏ ⴷⴻⴳ ⵜⴻⴷⵢⴰⵏⵜ ⵜⴰⴷⴰⵎⵙⴰⵏⵜ ⵜⴰⵎⴻⵇⵔⴰⵏⵜ ⴰⴽⴽ ⴰⵢ ⴷ-ⵢⴻⵜⵜⵉⵍⵉⵏ ⴷⴻⴳ ⵍⴻⵣⵣⴰⵢⴻⵔ, ⵢⴻⵔⵏⵓ ⵜⴻⵍⵍⴰ-ⴷ ⵜⵎⵓⴳⴻⵔⵜ-ⴰ ⴷⴻⴳ ⵍⴻⵇⵚⴻⵔ ⵏ ⵜⵣⵉⴽⴽⵏⵉⵏ (ⴷⴻⴳ ⵓⵣⵓⵎⴱⵉ ⵏ ⵢⵉⵍⴻⵍ, ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ) ⵙ ⵓⵙⴻⵏⵜⴻⵍ ⵏ « ⵓⵙⵙⴻⴼⵜⵉ ⴷ ⵜⴻⵕⵎⵉⵙⵜ ⴷⴻⴳ ⵡⵓⵍ ⵏ ⵜⴷⴰⵎⵙⴰ ⵜⴰⵔⴰⵔⴰⵢⵜ ».

ⵢⴻⵃⴷⴻⵕ ⵓⵏⴻⵖⵍⴰⴼ ⵏ ⵜⵏⴻⵣⵣⵓⵜ (ⵜⵉⴵⴰⵔⴰ), ⴱⴰⴽⵀⵜⵉ ⴱⴻⵍⴰⵉⴱ, ⴷⴻⴳ ⵜⴼⵓⴳⵍⴰ (ⵃⴰⴼⵍ) ⵏ ⵡⴻⵅⵜⴰⵎ ⵢⴻⵔⵏⵓ ⵢⴻⵏⵏⴰ-ⴷ ⴷⴰⴽⴽⴻⵏ ⴰⵎⴰⵢⵏⵓ ⴷⴻⴳ ⵜⵎⵓⴳⴻⵔⵜ ⵏ ⵓⵙⴻⴳⴳⴰⵙ-ⴰ ⴷ ⴰⵜⵜⴻⴽⴽⵉ ⵏ ⵜⴱⴰⵏⴽⴰ ⵜⴰⵄⵕⴰⴱⵜ ⵏ ⵡⴻⵙⵏⴻⴼⵍⵉ ⴰⴷⴰⵎⵙⴰⵏ ⴷⴻⴳ ⵜⴻⴼⵔⵉⵇⵜ, ⴷ ⵜⵉⵏ ⴰⵢ ⴷ-ⵢⴻⵡⵡⵉⵏ ⵢⵉⴷ-ⵙ ⴰⵣⴰⵍ ⵏ 100 ⵏ ⵜⴻⵕⵎⵉⵙⵉⵏ ⵜⵉⴼⵔⵉⵇⵉⵢⵉⵏ ⵏ ⵡⴰⴵⴰⵡ ⴰⴽⴽⴻⵏ ⴰⴷ ⵜⴻⵏ-ⵜⵄⴰⵡⴻⵏ ⴷⴻⴳ ⵜⵎⴻⵙⵖⵉⵡⵜ ⵏ ⵙⵙⴻⵍⵄⴰ ⵜⴰⴷⵣⴰⵢⵔⵉⵜ.

ⵉⵎⵙⵓⴷⴷⵙⴻⵏ ⵏ ⵜⵎⵓⴳⴻⵔⵜ-ⴰ ⵜⵉⵙ 49 ⴼⴽⴰⵏ ⴰⵎⴽⴰⵏ ⵏ ⵢⵉⵏⴻⴱⴳⵉ ⵏ ⵢⵉⵙⴻⵖ ⵉ ⵜⴻⵕⵎⵉⵙⵉⵏ ⵜⵉⴼⵔⵉⵇⵉⵢⵉⵏ ⵜⵉⵎⴰⴵⴰⵡⵉⵏ (ⵎⵓⵙⵜⴰⵡⵔⵉⴷⴰ) ⴰⵢ ⵢⴻⵔⵣⴰⵏ ⴷⴰⵖ ⵖⴻⴼ ⵜⵎⴻⵙⵔⵉⵜ ⵜⵉⵙ 5 ⵏ ⵓⵙⵙⵉⴵⴻⵡ ⴰⴷⵣⴰⵢⵔⵉ ⴰⵢ ⴷ-ⵢⴻⵍⵍⴰⵏ ⴷⴻⴳ ⵢⵉⵊⵉⴼⴻⵕ ⵏ ⵜⵎⵓⴳⴻⵔⵜ-ⴰ.

ⵜⴰⵎⴻⵙⵔⵉⵜ-ⴰ ⵢⴻⵎⵎⵓⵣⵣⴳⴻⵏ ⵜⵜⴻⴽⴽⴰⵏⵜ ⴷⴻⴳ-ⵙ ⴷⴰⵖ ⴰⵣⴰⵍ ⵏ 180 ⵏ ⵜⴻⵕⵎⵉⵙⵉⵏ ⵉⵅⴻⴷⴷⵎⴻⵏ ⴷⴻⴳ ⵢⴻⵃⵔⵉⵛⴻⵏ ⵢⴻⵎⴳⴻⵔⵔⴰⴷⴻⵏ ⴰⵎ ⵜⵓⵞⵞⵉⵜ, ⵉⵎⴻⵥⵍⴰ (ⵅⴰⴷⴰⵎⴰⵜ), ⵜⴰⵎⴳⵓⵔⵉ ⵜⴰⴽⵔⵓⵔⴰⵏⵜ, ⵜⴰⵎⴳⵓⵔⵉ ⵜⴰⵖⵔⴰⴼⴰⵏⵜ, ⵍⴻⴱⵏⵉ ⴷ ⵢⵉⵎⴰⵀⵉⵍⴻⵏ ⵉⵏⴰⴳⴷⵓⴷⴻⵏ ⴷ ⵜⴻⵏⴹⵉ (ⵚⵉⵏⴰⵄⴰ ⵜⴰⵇⵍⵉⴷⵉⵢⵢⴰ).