Asebter amenzawi
Yemmuger uselway amali Noureddine Bedoui
BAMAKO – Yemmuger uselway amali, Ibrahim Boubacar Keita, ass n lexmis deg Bamako, aneɣlaf adzayri n tɣawsiwin n daxel, Noureddine Bedoui.
Yella-d wemyager-a s weḥdaṛ n uneɣlaf amali n tɣawsiwin n wezɣar, Abdoulaye Diop, aneɣlaf n tedbelt tamnaḍant, Driss Maiga, anmahal (safir) n Ldzayer deg Mali, Boualem Chebihi, d wenmahal amali deg Lezzayer, Nainy Toure.
Deg yiwet n tseɣrut (taṣriḥ) i tɣemsa deg tgara n wemyager-a, yenna-d Mass Bedoui dakken « yessaweḍ-d » i uselway amali sslam n uselway n tegduda, Abdelaziz Bouteflika, d « lebɣi d uɛewwel-nnes ijehden » i ukemmel n webdad i lmend n unabaḍ (ḥukuma) d weɣref imaliyen deg ussefɛel n wemtawa n talwit d wemsuɣal deg Mali ay stenyan akk yidisan imaliyen, deg usurif amezwaru deg Mayu n 2015, sakkin, deg usurif wis sin, deg Yunyu n useggas-nni. Amtawa-a yella-d d lɣella n 5 n tuzzyiwin n lemcawṛat ay d-yebdan deg Yulyu n 2014 s tebdammast tagraɣlant yellan ddaw ṛṛay n Lezzayer.
Yenna-d daɣ Mass Bedoui dakken iwekkel-it uselway amali akken ad yessiweḍ sslam i uselway Abdelaziz Bouteflika, am wakken ay d-yerna dakken amyager-a yella-d d tagnit i « ussukku n tiṭ ɣef ttawilat n ussefɛel n wemtawa n talwit d wemsuɣal deg Mali ».
Iɛawed iwekked-d uneɣlaf n tɣawsiwin n daxel ɣef « lebɣi n Lezzayer ad tessefɛel tinqiḍin tigejdanin n wemtawa-a umi yefka uselway n tegduda, Abdelaziz Bouteflika, azal d ameqran ».
