Asebter amenzawi
Azref n weɣref aṣeḥrawi: wekkden-d yesdawanen ɣef ḍḍeɛfan n Useqqamu n Yizerfan n Wemdan
PARIS – Sḥassfen, ass n lexmis yesdawanen d yemttekkiyen n usarag ay d-yellan deg tesdawit n Paris Descartes-Sorbonnes ɣef Uneẓruf Utrim, ɣef « ḍḍeɛfan » n tsuda (mu’assasat) tigraɣlanin deg wayen yerzan imenɣi ɣef wezref n Yiseḥrawiyen i ugguccelman, ladɣa Aseqqamu n Yizerfan n Wemdan.
« Azref n ugguccelman (taqrir al-maṣir) ur yelli deg wahil n Useqqamu n Yizerfan n Wemdan », ɣef wakken ay d-tenna tmezzayt n lqanun Delphine Lourtau n tesdawit n Cornell (New York), « ula ma wa seg yizerfan n wemdan yernu yegguni-t ussefɛel », ɣef wakken ay d-twekked deg usarag-nnes umi tsemma « Assuter n yizerfan idamsanen, inmettiyen d yidelsanen n Uneẓruf Utrim ».
« Yesskanay-d waya, ɣef wakken ay d-tenna, tilisa n unagraw agraɣlan d ḍḍeɛfan n lqanun agraɣlan », am wakken ay d-tweṣṣa ɣef ukemmel n yimenɣi i usseḍher n « tafat » ɣef temsalt n Uneẓruf Utrim.
Deg tedwilt tussnant umi semman « D tamsalt n yizerfan uqbel ma tella d ayen niḍen », yella-d aṭas n wawal ɣef ussiweḍ ur yessaweḍ unagraw (niḍam) agraɣlan d tsuda-nnes akken ad d-sbanen ixeṣṣaren yeggten ayyes d-tegla tuḍḍfa tameṛṛukit ɣef wakal n Uneẓruf Utrim deg wenrar n yizerfan n wemdan.
Dɣa deg temsalt-a ay d-tenna Joanna Allan (tasdawit n Leeds, Briṭanya Tameqrant) dakken yella-d wetɛeddi ɣef lḥeṛma n tsednan tiṣeḥrawiyin yernu llant cchadat d yirupurṭajen ay d-yettakfen ttbut ɣef waya.
Gren-d tamawt, yemttekkiyen niḍen, ɣef tɣelnaẓri (waṭaniyya) ijehden ay yellan ɣer tsednan tiṣeḥrawiyin ay yettekkayen s tidet deg tudert tanmettit-tasertant n Uneẓruf Utrim, yernu d nitenti ay d timezwura ay yettgen timeskanin deg yikalen yettwaḍḍfen.
