Asebter amenzawi
Snat n ledwaṛ akken ad tbeddel tegnit deg wesbiṭar n « Che Guevara » n Mestɣanem
MESTɣANEM – Yefka uneɣlaf n tdawsa, Abdelmalek Boudiaf, ass n lexmis deg Mestɣanem, tallit n snat n ledwaṛ i unemhal (mudir) n wesbiṭar n « Che Guevara » akken ad ibeddel tagnit n diri aydeg yella wesbiṭar-a.
Deg yiwen n wemyager d yikataren (iṭarat) n tdawsa n twilayt-a d yigensasen (mumattilin) n tiddukliwin, yenna-d Mass Boudiaf dakken ad tettwazen tesmilt n ussefqed dduṛt ay d-yetteddun ɣer wesbiṭar n « Che Guevara » deg Mestɣanem akken ad tessefqed ma ttwakksen wuguren yellan deg wesbiṭar-a.
Yenna-d daɣ uneɣlaf dakken ad d-yettwaqeddem uṛabul deg tezwara n dduṛt ay d-yetteddun i unemhal n wesbiṭar-a, d win aydeg llant 24 n tenqiḍin ur yettwaqeblen umi gren tamawt yimaswaḍen deg terzi-nsen war aɛeyyen n wass n laṛebɛa.
Iḥettet-d Mass Boudiaf ɣef ussefɛel n yeɣtasen (qararat) n weɣlif, ladɣa tid yerzan tuffɣa n yimazzagen (muxtaṣṣin) seg wesbiṭar-a ɣer yesbiṭaren niḍen anda ur llint tmezzugin-nsen i udawi n yimuḍinen akken ineggura-a ur d-ttɛettiben ɣer wesbiṭar-a yernu akken ad yenqes lḥeṛs ɣef wesbiṭar-a.
Yenna-d daɣ uneɣlaf dakken tafatuṛt n yisafaren n udawi n ukensir terna s 64% ɣef leḥsab n useggas yezrin, yernu iwekked-d dakken aselway n tegduda, Abdelaziz Bouteflika, la yesseḥbibir ɣef lemɛawna deg uxelleṣ n tfatuṛt-a imi isafaren-a ttunefkayen baṭel i yimuḍinen ula ma ɣlayit deg ssuq agraɣlan.
