Asebter amenzawi

Tebda Temlilit n 3 n yidisan ddaw tselwit n uneɣlaf amenzu Abdelmalek Sellal

LEZZAYER TAMANEɣT– Tebda temlilit tis 19 n 3 n yidisan gar unabaḍ (ḥukuma), Tadukli Tamatut n Yixeddamen Idzayriyen d yiɣfawen n teṛmisin, ass n lḥedd taṣebḥit deg Ldzayer Tamaneɣt, ddaw tselwit n uneɣlaf amenzu, Abdelmalek Sellal.

Deg tezwara n temlilit, bedden yemttekkiyen tadqiqt n tsusmi akken ad rren tajmilt i uselway n Tegduda Taɛṛabt Taṣeḥrawit Tamegdayt d umaru amatu n Terni n Polisario, Mohamed Abdelaziz, ay yewwḍen leɛfu n Ṛebbi ass n ttlata yezrin deffir yiwen n waḍḍan ɣezzifen.

Deg wayen yerzan timliliyin-a, 3 n temsal tinmettiyin-tidamsanin ay ssefran ad ssiwlen fell-asent. Tamezwarut d abrid ad yettwaḍefren deg unnerni adamsan n 2016-2019, tis snat d aqeyyem n werkawal adamsan d wenmetti deg temsal n ussefti d ussemres (tawḍif), ma d tis kraḍt d anagraw aɣelnaw n testaɣt (taqaɛud).

S waya, ad d-yili wawal, deg temlilit-a, ɣef tmudemt (namudaǧ) tamaynut n unnerni adamsan, am wakken ad d-yili wesqerdec ɣef « yibeddilen ay yessefken ad d-ilin deg unagraw aɣelnaw n testaɣt », ɣef wakken ay d-yenna yiwen n welɣu (bayan) n yimeẓla n uneɣlaf amenzu.

Seg yidis niḍen, yernu deg ukatar n yiwehhiyen n uselway n tegduda, Abdelaziz Bouteflika yeqqnen ɣer Werkawal Adamsan d Wenmetti ay yettwastenyan deg 2014, ad d-yili uqeyyem n ussefɛel n werkawal-a deg wenrar.

Timlilit tis 18 n 3 n yidisan ay d-yellan deg Tbeskert deg Tubeṛ n 2015 d tin aydeg d-yella weckaṛ n « yisurifen imeqranen » ay d-yellan deg ussefɛel n werkawal-a.