Asebter amenzawi

Tuffɣa n tedfaɛt tis 45 n Uɣerbaz n Tedbelt tella-d deg tallit s wazal-nnes deg lebni n tmurt

LEZZAYER TAMANEɣT– Yenna-d uneɣlaf n tɣawsiwin n daxel, Noureddine Bedoui, ass n ssebt deg Lezzayer Tamaneɣt, dakken tuffɣa n tedfaɛt tis 45 n yinelmaden n Uɣerbaz Aɣelnaw n Tedbelt tella-d deg tegnit s wazal-nnes deg umecwaṛ n lebni n tmurt yernu d aya ay d-yessuturen seg wemdan ad d-yessken tizemmar-nnes.

Deg yiwet n tinawt i lmend n waya, yenna-d Mass Bedoui dakken tuffɣa n tedfaɛt-a tella-d deg tallit yettḥulfun i ubeddel yernu d tin ad yuraren dduṛ deg lebni n tmurt, yernu d aya ay yeḥwajen asskan n tzemmar yeffren d tid d-yettwalemden d uɣellet-nsent i uqabel n yecqirrwen n teswiɛt-a.

Awehhi iṣeḥḥan wuɣur iwehha uwanak (dawla) adzayri tasertit-nnes d wemsefham gar warraw n tmetti tadzayrit, nnig ljehd n Tredsa (ǧayc) Taɣelnawt Taɣerfant, d ttawilat yeddan ɣer yidis n wussisen n lebni n tmurt, ɣef wakken ay d-yenna.

Deffir ma yesteṛḥeb s tedfaɛt ay d-yeffɣen aseggas-a, tin aydeg llan 101 n yinelmaden, iwekked-d uneɣlaf dakken timussniwin ay d-kesben yinelmaden-a deg ussileɣ-nsen (takwin) d tid ad ten-yeǧǧen, war ccek, ad srebḥen amecwaṛ-nsen n uxeddim, d amecwaṛ aydeg « yessefk ad ḍḍfen deg tmasit (mas’uliyya) yernu ad xedmen i wesmal n umeẓlu anagdud n tɣara yernu s tmussni n ṣṣenɛa ».

Akken ad yettwaweḍ yeswi-a, yenna-d uneɣlaf n tɣawsiwin n daxel dakken yeḍfer weɣlif yiwet n tiddit aydeg yettnadi ad ifak tabiruqraṭit, ad yessetrer tadbelt yernu ad yesselhu ameẓlu anagdud i lmend wesduqqes n ukala n wesnefli (tanmiya).