Asebter amenzawi

Axxam n tɣemsa n Tiziz Wezzu ad yebdu axeddim seg-a ɣef kra n ledwaṛ (aneɣlaf)

TIZI WEZZU – Yenna-d uneɣlaf n teɣwalt, Hamid Grine, ass n ssebt, dakken axxam n tɣemsa n Malik-Ait-Aoudia n Tizi Wezzu ad yebdu axeddim seg-a ɣef 2 neɣ 3 n ledwaṛ.

Yenna-d Mass Grine, deg yiwen n wemyager d tɣemsa ay d-yellan deg yijifeṛ n terzi-nnes n uxeddim ɣef twilayt n Tizi Wezzu, dakken alug n ccuruḍ n wexxam-a n tɣemsa qrib ad d-yewjed deg wexxam n tɣemsa n Tahar-Djaout n Lezzayer Tamaneɣt yernu axxam n tɣemsa n Tizi Wezzu ad d-yeqqen ɣer win n Lezzayer deg temsal n ussefrek (tasyir).

Aɛeḍḍel ay d-yellan deg ubeddu n uxeddim n wexxam n tɣemsa n Malik-Ait-Aoudia (yettwareẓmen ass n 22 Tubeṛ 2015) ssebba-nnes d « tikmarin tibiruqraṭiyin » yernu ttwakksent imir-a, ɣef wakken ay d-yessefhem uneɣlaf.

Deg tririt ɣef yiwet n tuttra ɣef tlelli n wawal deg Lezzayer, yenna-d uneɣlaf dakken anagraw n wezmal (tanqiṭ) d usettef n tmura ɣef leḥsab n tlelli n wawal « ur yebni ɣef wetɛeddi ay d-yettilin ɣef tlelli n wawal, wanag yebna, s umata, ɣef wayen ay la d-ttinin wid yellan deg udabu (imaslaḍen n unabaḍ, irgazen n yiweẓla, atg.) ».

D acu kan, ɣef leḥsab-nnes, Lezzayer tga isurifen d imeqranen yernu gar yisurifen-a, tuɣal ur tḥebbes ineɣmasen.

« Ur llin, deg Lezzayer, la ineɣmasen yettwaḥebsen wala iɣmisen yettwaɣelqen ɣef ljal n yiwen kan n umagrad, am wakken ur yelli ula d yiwen n uneɣmas umi yettwargel webrid akken ad yeg axeddim-nnes », ɣef wakken ay d-iwekked.