Asebter amenzawi
Iɛezza uselway Bouteflika tawacult n uleggam amarikani Mohamed Ali
LEZZAYER TAMANEɣT – Iɛezza uselway n tegduda, Abdelaziz Bouteflika, ass n lḥedd, tawacult n uleggam amarikani Mohamed Ali Clay yernu yeckeṛ-d uselway « adduden imeẓralsen (insaniyya) d tigawin talsanin » ay iga umeṛḥum.
« D argaz meɣɣren ay yewwḍen leɛfu n Ṛebbi, d argaz umi iseffeq umaḍal d iseggasen ɣef tebɣest-nnes ibanen d tiɛɛuwja-nnes tafeɣnamit, netta ay yernan akk ileggamen uẓwiren n tallit-nnes. Yeqqim d agellid n tleggilt azal n 20 n yiseggasen yernu yuɣal d tamacahut deg waddal-a », ɣef wakken ay d-iwekked yiɣef n tmurt deg tebṛat-nnes n uɛezzi.
« Menɣir tizemmar-nnes tifekkanin, yufrar-d umeṛḥum s ṣṣifa-nnes n wemsuref, n terqeq d ṛṛeḥma, s ljehd n tneffut-nnes deg yimenɣi yernu d aya ay yessilin aswir-nnes ɣer yidis n weẓwar-nnes deg waddal ».
« Ulac ccek dakken lqanaɛat-nnes deg ddin, adduden-nnes imeẓralsen d tigawin-nnes talsanin d nitni ay as-d-inejṛen abrid akken yedder deg liser yernu ad yesseḥbiber ɣef liser n wiyaḍ, am wakken ay t-tɛawen, deg waya, yiwet n twennaḍt n tlelli d tugdut », ɣef wakken ay d-yerna uselway Bouteflika.
« D wa ay d abrid ay d-yenjeṛ i yiman-nnes yernu yuɣ-it s wussis n tfekka d ṛṛuḥ akken ad yeg lxir war ma iga meḥyaf gar medden ama deg laṣel-nsen, ama deg ddin, ama deg yini n weglim-nsen, yernu wa d addud ahaggar, d win ad yeddun yid-s ɣer uẓekka, deg temḍelt aydeg ad ḥedṛen yemdanen n ddyanat yemgerraden », ɣef wakken ay d-yerna.
« Ad rreɣ tajmilt, deg tazwara, i wergaz, i uzamul n waddal ahaggar d wasaḍ n wuḍlimen n umaḍal, deɛɛuɣ i Ṛebbi, Bab n Tezmert, deg wayyur-a imqeddes, ad t-yeṛḥem yernu ad t-yerẓeq ljennet-nnes tawesɛant ɣer yidis n lmumnin d wid iṣelḥen. Ttɛuzzuɣ seg wul, s yisem-inu d yisem n weɣref adzayri, tawacult n umeṛḥum. Ad d-yazen Ṛebbi ṣṣber i wayt twacult-nnes deg tegnit-a tuqriḥt », ɣef wakken ay tt-id-yextem uselway Bouteflika.
