ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵉⵄⴻⵣⵣⴰ ⵓⵙⴻⵍⵡⴰⵢ ⴱⵧⵓⵜⴻⴼⵍⵉⴽⴰ ⵜⴰⵡⴰⵛⵓⵍⵜ ⵏ ⵓⵍⴻⴳⴳⴰⵎ ⴰⵎⴰⵔⵉⴽⴰⵏⵉ ⵎⵧⵀⴰⵎⴻⴷ ⴰⵍⵉ
ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⵉⵄⴻⵣⵣⴰ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ, ⴰⴱⴷⴻⵍⴰⵣⵉⵣ ⴱⵧⵓⵜⴻⴼⵍⵉⴽⴰ, ⴰⵙⵙ ⵏ ⵍⵃⴻⴷⴷ, ⵜⴰⵡⴰⵛⵓⵍⵜ ⵏ ⵓⵍⴻⴳⴳⴰⵎ ⴰⵎⴰⵔⵉⴽⴰⵏⵉ ⵎⵧⵀⴰⵎⴻⴷ ⴰⵍⵉ ⵛⵍⴰⵢ ⵢⴻⵔⵏⵓ ⵢⴻⵛⴽⴻⵕ-ⴷ ⵓⵙⴻⵍⵡⴰⵢ « ⴰⴷⴷⵓⴷⴻⵏ ⵉⵎⴻⵥⵔⴰⵍⵙⴻⵏ (ⵉⵏⵙⴰⵏⵉⵢⵢⴰ) ⴷ ⵜⵉⴳⴰⵡⵉⵏ ⵜⴰⵍⵙⴰⵏⵉⵏ » ⴰⵢ ⵉⴳⴰ ⵓⵎⴻⵕⵃⵓⵎ.
« ⴷ ⴰⵔⴳⴰⵣ ⵎⴻⵖⵖⵔⴻⵏ ⴰⵢ ⵢⴻⵡⵡⴹⴻⵏ ⵍⴻⵄⴼⵓ ⵏ ⵕⴻⴱⴱⵉ, ⴷ ⴰⵔⴳⴰⵣ ⵓⵎⵉ ⵉⵙⴻⴼⴼⴻⵇ ⵓⵎⴰⴹⴰⵍ ⴷ ⵉⵙⴻⴳⴳⴰⵙⴻⵏ ⵖⴻⴼ ⵜⴻⴱⵖⴻⵙⵜ-ⵏⵏⴻⵙ ⵉⴱⴰⵏⴻⵏ ⴷ ⵜⵉⵄⵄⵓⵡⵊⴰ-ⵏⵏⴻⵙ ⵜⴰⴼⴻⵖⵏⴰⵎⵉⵜ, ⵏⴻⵜⵜⴰ ⴰⵢ ⵢⴻⵔⵏⴰⵏ ⴰⴽⴽ ⵉⵍⴻⴳⴳⴰⵎⴻⵏ ⵓⵥⵡⵉⵔⴻⵏ ⵏ ⵜⴰⵍⵍⵉⵜ-ⵏⵏⴻⵙ. ⵢⴻⵇⵇⵉⵎ ⴷ ⴰⴳⴻⵍⵍⵉⴷ ⵏ ⵜⵍⴻⴳⴳⵉⵍⵜ ⴰⵣⴰⵍ ⵏ 20 ⵏ ⵢⵉⵙⴻⴳⴳⴰⵙⴻⵏ ⵢⴻⵔⵏⵓ ⵢⵓⵖⴰⵍ ⴷ ⵜⴰⵎⴰⵛⴰⵀⵓⵜ ⴷⴻⴳ ⵡⴰⴷⴷⴰⵍ-ⴰ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵉⵡⴻⴽⴽⴻⴷ ⵢⵉⵖⴻⴼ ⵏ ⵜⵎⵓⵔⵜ ⴷⴻⴳ ⵜⴻⴱⵕⴰⵜ-ⵏⵏⴻⵙ ⵏ ⵓⵄⴻⵣⵣⵉ.
« ⵎⴻⵏⵖⵉⵔ ⵜⵉⵣⴻⵎⵎⴰⵔ-ⵏⵏⴻⵙ ⵜⵉⴼⴻⴽⴽⴰⵏⵉⵏ, ⵢⵓⴼⵔⴰⵔ-ⴷ ⵓⵎⴻⵕⵃⵓⵎ ⵙ ⵚⵚⵉⴼⴰ-ⵏⵏⴻⵙ ⵏ ⵡⴻⵎⵙⵓⵔⴻⴼ, ⵏ ⵜⴻⵔⵇⴻⵇ ⴷ ⵕⵕⴻⵃⵎⴰ, ⵙ ⵍⵊⴻⵀⴷ ⵏ ⵜⵏⴻⴼⴼⵓⵜ-ⵏⵏⴻⵙ ⴷⴻⴳ ⵢⵉⵎⴻⵏⵖⵉ ⵢⴻⵔⵏⵓ ⴷ ⴰⵢⴰ ⴰⵢ ⵢⴻⵙⵙⵉⵍⵉⵏ ⴰⵙⵡⵉⵔ-ⵏⵏⴻⵙ ⵖⴻⵔ ⵢⵉⴷⵉⵙ ⵏ ⵡⴻⵥⵡⴰⵔ-ⵏⵏⴻⵙ ⴷⴻⴳ ⵡⴰⴷⴷⴰⵍ ».
« ⵓⵍⴰⵛ ⵛⵛⴻⴽ ⴷⴰⴽⴽⴻⵏ ⵍⵇⴰⵏⴰⵄⴰⵜ-ⵏⵏⴻⵙ ⴷⴻⴳ ⴷⴷⵉⵏ, ⴰⴷⴷⵓⴷⴻⵏ-ⵏⵏⴻⵙ ⵉⵎⴻⵥⵔⴰⵍⵙⴻⵏ ⴷ ⵜⵉⴳⴰⵡⵉⵏ-ⵏⵏⴻⵙ ⵜⴰⵍⵙⴰⵏⵉⵏ ⴷ ⵏⵉⵜⵏⵉ ⴰⵢ ⴰⵙ-ⴷ-ⵉⵏⴻⵊⵕⴻⵏ ⴰⴱⵔⵉⴷ ⴰⴽⴽⴻⵏ ⵢⴻⴷⴷⴻⵔ ⴷⴻⴳ ⵍⵉⵙⴻⵔ ⵢⴻⵔⵏⵓ ⴰⴷ ⵢⴻⵙⵙⴻⵃⴱⵉⴱⴻⵔ ⵖⴻⴼ ⵍⵉⵙⴻⵔ ⵏ ⵡⵉⵢⴰⴹ, ⴰⵎ ⵡⴰⴽⴽⴻⵏ ⴰⵢ ⵜ-ⵜⵄⴰⵡⴻⵏ, ⴷⴻⴳ ⵡⴰⵢⴰ, ⵢⵉⵡⴻⵜ ⵏ ⵜⵡⴻⵏⵏⴰⴹⵜ ⵏ ⵜⵍⴻⵍⵍⵉ ⴷ ⵜⵓⴳⴷⵓⵜ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵔⵏⴰ ⵓⵙⴻⵍⵡⴰⵢ ⴱⵧⵓⵜⴻⴼⵍⵉⴽⴰ.
« ⴷ ⵡⴰ ⴰⵢ ⴷ ⴰⴱⵔⵉⴷ ⴰⵢ ⴷ-ⵢⴻⵏⵊⴻⵕ ⵉ ⵢⵉⵎⴰⵏ-ⵏⵏⴻⵙ ⵢⴻⵔⵏⵓ ⵢⵓⵖ-ⵉⵜ ⵙ ⵡⵓⵙⵙⵉⵙ ⵏ ⵜⴼⴻⴽⴽⴰ ⴷ ⵕⵕⵓⵃ ⴰⴽⴽⴻⵏ ⴰⴷ ⵢⴻⴳ ⵍⵅⵉⵔ ⵡⴰⵔ ⵎⴰ ⵉⴳⴰ ⵎⴻⵃⵢⴰⴼ ⴳⴰⵔ ⵎⴻⴷⴷⴻⵏ ⴰⵎⴰ ⴷⴻⴳ ⵍⴰⵚⴻⵍ-ⵏⵙⴻⵏ, ⴰⵎⴰ ⴷⴻⴳ ⴷⴷⵉⵏ, ⴰⵎⴰ ⴷⴻⴳ ⵢⵉⵏⵉ ⵏ ⵡⴻⴳⵍⵉⵎ-ⵏⵙⴻⵏ, ⵢⴻⵔⵏⵓ ⵡⴰ ⴷ ⴰⴷⴷⵓⴷ ⴰⵀⴰⴳⴳⴰⵔ, ⴷ ⵡⵉⵏ ⴰⴷ ⵢⴻⴷⴷⵓⵏ ⵢⵉⴷ-ⵙ ⵖⴻⵔ ⵓⵥⴻⴽⴽⴰ, ⴷⴻⴳ ⵜⴻⵎⴹⴻⵍⵜ ⴰⵢⴷⴻⴳ ⴰⴷ ⵃⴻⴷⵕⴻⵏ ⵢⴻⵎⴷⴰⵏⴻⵏ ⵏ ⴷⴷⵢⴰⵏⴰⵜ ⵢⴻⵎⴳⴻⵔⵔⴰⴷⴻⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵔⵏⴰ.
« ⴰⴷ ⵔⵔⴻⵖ ⵜⴰⵊⵎⵉⵍⵜ, ⴷⴻⴳ ⵜⴰⵣⵡⴰⵔⴰ, ⵉ ⵡⴻⵔⴳⴰⵣ, ⵉ ⵓⵣⴰⵎⵓⵍ ⵏ ⵡⴰⴷⴷⴰⵍ ⴰⵀⴰⴳⴳⴰⵔ ⴷ ⵡⴰⵙⴰⴹ ⵏ ⵡⵓⴹⵍⵉⵎⴻⵏ ⵏ ⵓⵎⴰⴹⴰⵍ, ⴷⴻⵄⵄⵓⵖ ⵉ ⵕⴻⴱⴱⵉ, ⴱⴰⴱ ⵏ ⵜⴻⵣⵎⴻⵔⵜ, ⴷⴻⴳ ⵡⴰⵢⵢⵓⵔ-ⴰ ⵉⵎⵇⴻⴷⴷⴻⵙ, ⴰⴷ ⵜ-ⵢⴻⵕⵃⴻⵎ ⵢⴻⵔⵏⵓ ⴰⴷ ⵜ-ⵢⴻⵔⵥⴻⵇ ⵍⵊⴻⵏⵏⴻⵜ-ⵏⵏⴻⵙ ⵜⴰⵡⴻⵙⵄⴰⵏⵜ ⵖⴻⵔ ⵢⵉⴷⵉⵙ ⵏ ⵍⵎⵓⵎⵏⵉⵏ ⴷ ⵡⵉⴷ ⵉⵚⴻⵍⵃⴻⵏ. ⵜⵜⵄⵓⵣⵣⵓⵖ ⵙⴻⴳ ⵡⵓⵍ, ⵙ ⵢⵉⵙⴻⵎ-ⵉⵏⵓ ⴷ ⵢⵉⵙⴻⵎ ⵏ ⵡⴻⵖⵔⴻⴼ ⴰⴷⵣⴰⵢⵔⵉ, ⵜⴰⵡⴰⵛⵓⵍⵜ ⵏ ⵓⵎⴻⵕⵃⵓⵎ. ⴰⴷ ⴷ-ⵢⴰⵣⴻⵏ ⵕⴻⴱⴱⵉ ⵚⵚⴱⴻⵔ ⵉ ⵡⴰⵢⵜ ⵜⵡⴰⵛⵓⵍⵜ-ⵏⵏⴻⵙ ⴷⴻⴳ ⵜⴻⴳⵏⵉⵜ-ⴰ ⵜⵓⵇⵔⵉⵃⵜ », ⵖⴻⴼ ⵡⴰⴽⴽⴻⵏ ⴰⵢ ⵜⵜ-ⵉⴷ-ⵢⴻⵅⵜⴻⵎ ⵓⵙⴻⵍⵡⴰⵢ ⴱⵧⵓⵜⴻⴼⵍⵉⴽⴰ.
