Asebter amenzawi

Anqas n tfatuṛt n waǧaw n yimendi s 28% deg 4 n wayyuren imezwura n 2016

LEZZAYER TAMANEɣT – Tenqes tfatuṛt n waǧaw n yimendi (irden, akbal d temẓin) s wugar n 28% deg 4 n wayyuren imezwura n 2016, maca tasmekta (kammiyya) n yimendi ay d-yettwaǧwen ur tenqis s waṭas.

S waya, tafatuṛt n waǧaw n yimendi tenqes-d ɣer 940,89 n yimelyunen n yidulaṛen deg 4 n wayyuren imezwura n 2016, deg wakud aydeg aǧaw yesqam-d 1,31 d amelyaṛ n yidulaṛen deg 2015 deg tallit-a ɣef wakken ay aɣ-d-txebber tedwant.

Tasmekta ay d-yettwaǧwen tenqes-d ɣer 4,39 n yimelyunen n yiṭunen deg wakud aydeg ilindi, tuǧew-d Lezzayer 4,85 n yimelyunen n yiṭunen, s waya, yella-d wenqas n 9,5% deg tesmekta ay d-yettwaǧwen, ɣef wakken ay d-yenna Wammas Aɣelnaw n Tsenselkimt d Taddadanin n Tedwant.

Tafatuṛt n waǧaw n yirden (ileqqaqen d yiquranen) tenqes-d ɣer 660,57 n yimelyunen n yidulaṛen, deg wakud aydeg ilindi deg tallit-a, yesqam-d waǧaw 871,76 n yimelyunen n yidulaṛen (d anqas n 24,23%)n maca tasmekta terna ɣer 2,83 n yimelyunen n yiṭunen, yili ilindi tettwaǧew-d tesmekta n 2,8 n yimelyunen n yiṭunen n yirden.

Deg wayen yerzan akbal, tuǧew-d Lezzayer 221,14 n yimelyunen n yidulaṛen, deg wakud aydeg ilindi tuǧew-d 346,94 n yimelyunen yidulaṛen (d anqas n 36,26%), ma d tasmekta tenqes-d ɣer 1,23 d amelyun n yiṭunen yili ilindi ttwaǧwent-d 1,67 d amelyun n yiṭunen.

Seg yidis niḍen, tuǧew-d Lezzayer 59,17 n yimelyunen n yidulaṛen n temẓin yili ilindi, deg tallit-a, tuǧew-d 90 n yimelyunen n yidulaṛen n temẓin (d ansaq n 34,23%), ma d tasmekta n temẓin tenqes-d ɣer 324,52 n yiṭunen deg 4 n wayyuren imezwura n useggas-a, deg wakud aydeg ilindi tuǧew-d tmurt 379,58 n yiṭunen.

Anqas n tfatuṛt n yimendi ssebba-nnes d anqas n ssumat deg ssuq agraɣlan ay d-yebdan deg 2015 imi ay terbeḥ lɣella yernu tella lɛula d tameqrant.