Asebter amenzawi

Tamɣunt 1ut n Mobilis: Boudebouda d amarir wis 3 ad d-tessidef MC Lezzayer

LEZZAYER TAMANEɣT – Yestenya wemḥaddi Brahim Boudebouda n USM Lezzayer, ass n ttlata tameddit, leɛqed n sin n yiseggasen d teɣlamt n Muludeyya n Lezzayer yernu d netta ay d amarir amaynu wis 3 ay d-tessudef Muludeyya i tsemhuyt (mawsim) ay d-yetteddun.

Imidis-a azelmaḍ agraɣlan yeffeɣ-d ɣer tɣemsa deg tfugla (ḥafl) n westenyi ay d-yellan deg tesɣimt (maqarr) n teɣlamt n Muludeyya n Lezzayer, deg Lezzayer Tamaneɣt.

Leɛqed-a yella-d d « uɣal ɣer laṣel » i umarir-a n 26 n yiseggasen, ɣef wakken ay d-yenna usefrak amatu n teɣlamt, Nacer Bouiche, imi ay yebda Bendebouda urar deg Muludeyya seg 2011, sakkin yedda ad yurar deg teɣlamt tafṛensist n Mans gar 2011 d 2012.

Deffir umecwaṛ-nnes awezlan deg Fṛansa, yuɣal-d ɣer Lezzayer anda ay yurar d USM Ldzayer armi d ussan-a, mi ifuk leɛqed-nnes.

« Umareɣ (feṛḥeɣ) aṭas imi ay d-uɣaleɣ ɣer teɣlamt ay iyi-yessalɣen. Ad d-fkeɣ akk ayen umi zemreɣ akken ad ɛawneɣ taɣlamt-inu ad d-terbeḥ arrazen », ɣef wakken ay d-yenna umarir-a.

Ass n ssebt, tessadef-d Muludeyya n Lezzayer sin n yimariren imaynuten: alemmas n wenrar amenṭag n MO Bgayet, Zahir Zerdab, d umenṭag n ASM Wehṛan, Antar Djemaouni.

Aɛessas n yeswi, Farid Chaal, ay terḍel Muludeyya deg tsemhuyt yezrin i USM Lḥeṛṛac, yeqbel ad d-yuɣal ɣer Muludeyya deffir ma yenna-d, naqal, ad yettixer. D netta ad d-yuɣalen deg wemkan n uɛessas Faouzi Chaouchi ay teḥṛem Temɣunt n Tcirḍart Tasadurant seg uttekki deg 10 n temliliyin.

Armi d ass wis 29 n telɣuɣa ay tessaweḍ Muludeyya n Lezzayer ad teḍmen tiɣimit-nnes deg Temɣunt 1ut yernu d tikkelt tis snat anda ad as-yeḍru waya. Tikkelt-a, la tessefray teɣlamt-a ad d-tebnu iɣallen ad tt-yessiwḍen ɣer yimukan imezwura, ɣef wakken ay d-yenna wesleɣmay-nnes (mudarrib) amaynu, Djamel Menad.

Taɣlamt-a n Lezzayer Tamaneɣt ay irebḥen Taqbuct n Lezzayer, ad tettekki deg teẓrigt (ṭabɛa) ay d-yettedun n Teqbuct n Tkunfidiṛalit Tafriqit n Tcirḍart.