ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⴰⵙⵙⴻⵡⵊⴻⴷ ⵉ ⵓⵙⴰⵔⴰⴳ ⴰⴳⵔⴰⵖⵍⴰⵏ ⵖⴻⴼ ⵜⴻⵏⴹⴰ ⵜⴰⵙⵏⵓⴷⵔⴰⵏⵜ ⵏ ⵢⵉⵍⴻⵍ ⴷⴻⴳ ⵜⴻⵙⴷⴰⵡⵉⵜ ⵏ ⵡⴻⵀⵕⴰⵏ
ⵡⴻⵀⵕⴰⵏ - ⵍⴰ ⴷ-ⵢⴻⵜⵜⵉⵍⵉ ⵓⵙⵙⴻⵡⵊⴻⴷ ⵉ ⵜⴻⵥⵔⵉⴳⵜ (ⵟⴰⴱⵄⴰ) ⵜⴰⵎⴰⵢⵏⵓⵜ ⵏ ⵓⵙⴰⵔⴰⴳ ⴰⴳⵔⴰⵖⵍⴰⵏ ⵖⴻⴼ ⵜⴻⵏⴹⴰ ⵜⴰⵙⵏⵓⴷⵔⴰⵏⵜ (ⵜⴰⵏⴰⵡⵡⵓⵄ ⴱⵢⵓⵍⵓⴵⵉ) ⴷⴻⴳ ⵜⴻⵙⴷⴰⵡⵉⵜ ⵏ ⵡⴻⵀⵕⴰⵏ 1ⵓⵜ (ⴰⵀⵎⴻⴷ-ⴱⴻⵏⴱⴻⵍⵍⴰ), ⵖⴻⴼ ⵡⴰⴽⴽⴻⵏ ⴰⵢ ⴰⵖ-ⴷ-ⵢⴻⵏⵏⴰ, ⴰⵙⵙ ⵏ ⵍⴰⵕⴻⴱⵄⴰ, ⵓⵙⴻⵍⵡⴰⵢ ⵏ ⵜⴻⴷⵢⴰⵏⵜ-ⴰ ⵜⵓⵙⵙⵏⴰⵏⵜ, ⴰⵒⵕⵓⴼⵉⵙⵓⵔ ⵣⵉⵜⵧⵓⵏⵉ ⴱⵧⵓⵜⵉⴱⴰ.
ⵉⵙⵡⵉ ⵏ ⵡⴻⵎⵢⴰⴳⴻⵔ-ⴰ ⴷ ⴰⵙⵙⴻⴹⵀⴻⵔ ⵏ « ⴷⴷⵓⵕ ⴰⵎⴻⵇⵔⴰⵏ ⴰⵢ ⵜⴻⵜⵜⵓⵔⴰⵔ ⵍⴻⵣⵣⴰⵢⴻⵔ ⴷⴻⴳ ⵡⴻⵃⵔⴰⵣ ⵏ ⵜⴻⵏⴹⴰ ⵜⴰⵙⵏⵓⴷⵔⴰⵏⵜ ⵏ ⵢⵉⵍⴻⵍ ⴷ ⵢⵉⵔⵉ ⵏ ⵢⵉⵍⴻⵍ ⴷⴻⴳ ⵢⴻⵙⵡⵉⵔⴻⵏ ⵢⴻⵎⴳⴻⵔⵔⴰⴷⴻⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵡⴻⵒⵕⵓⴼⵉⵙⵓⵔ-ⴰ ⴰⵢ ⵉⵅⴻⴷⴷⵎⴻⵏ ⴷⴰⵖ ⴷ ⴰⵏⴻⵎⵀⴰⵍ ⴷⴻⴳ ⵢⵉⵏⴻⴳⵎⵉ (ⵎⴰⵅⴱⴰⵔ) ⵏ ⵓⵥⴻⴹⴹⴰ ⵏ ⵜⵄⴻⵙⵙⴰⵙⵜ ⵏ ⵜⵡⴻⵏⵏⴰⴹⵜ ⵢⴻⵇⵇⵏⴻⵏ ⵖⴻⵔ ⵜⴻⵙⴷⴰⵡⵉⵜ ⵏ ⵡⴻⵀⵕⴰⵏ 1ⵓⵜ.
ⵉ ⵍⵎⴻⵏⴷ ⵏ ⵡⴰⵢⴰ, ⵙⵙⵓⴼⴼⵖⴻⵏ-ⴷ ⵜⵉⵖⵔⵉ ⵉ ⵢⵉⵎⴰⵣⵣⴰⴳⴻⵏ (ⵎⵓⵅⵜⴰⵚⵚⵉⵏ) ⵏ ⵜⵓⵙⵙⵏⵉⵡⵉⵏ ⵏ ⵢⵉⵍⴻⵍ ⴰⵢ ⵢⴻⴱⵖⴰⵏ ⴰⴷ ⵜⵜⴻⴽⴽⵉⵏ, ⵢⴻⵔⵏⵓ ⴰⴷ ⵜⴻⵇⵇⵉⵎ ⵜⴻⵖⵔⵉ-ⴰ ⴰⵔⵎⴰ ⴷ ⴰⵎⴻⵏⵣⵓ ⵏ ⵢⵓⵍⵢⵓ. ⴰⴷ ⴷ-ⵢⵉⵍⵉ ⵓⵙⴰⵔⴰⴳ-ⴰ ⴷⴻⴳ ⵡⴻⵎⴱⴻⵔ ⴷⴷⴰⵡ ⵍⴻⵄⵏⴰⵢⴰ ⵏ ⵜⵎⴻⵀⵍⴰ ⵜⴰⵎⴰⵜⵓⵜ ⵏ ⵓⵏⴰⴷⵉ ⵓⵙⵙⵏⴰⵏ ⴷ ⵡⴻⵙⵏⴻⴼⵍⵉ ⴰⵙⵏⴰⵜⵡⵉⵍⴰⵏ (ⵜⵉⴽⵏⵓⵍⵓⴵⵉ).
ⴰⵙⴰⵔⴰⴳ-ⴰ ⴰⴷ ⴷ-ⵢⵉⵍⵉ ⴷ ⵜⴰⴳⵏⵉⵜ ⵉ ⵡⴻⵎⴱⴰⴷⴷⴻⵍ ⵏ ⵜⵎⵓⵙⵙⵏⵉⵡⵉⵏ ⴳⴰⵔ ⵢⵉⵎⴰⵙⵙⴰⵏⴻⵏ, ⵜⵉⵕⵎⵉⵙⵉⵏ (ⵛⴰⵔⵉⴽⴰⵜ) ⴷ ⵢⵉⴽⴰⵜⴰⵔⴻⵏ (ⵉⵟⴰⵔⴰⵜ) ⵏ ⵜⵙⵓⴷⴰ ⵉ ⵍⵎⴻⵏⴷ ⵏ « ⵡⴻⵔⵥⴰⵎ ⵏ ⵜⴻⵣⵔⵉⴱⵉⵏ ⵏ ⵓⵅⴻⵎⵎⴻⵎ ⵖⴻⴼ ⵓⵙⵙⴻⵊⵀⴻⴷ ⵏ ⵡⴻⵃⵔⴰⵣ ⵏ ⵍⴻⵚⵏⴰⴼ ⵉⵎⵓⴷⴷⵉⵔⴻⵏ ⴷ ⵜⵡⴻⵏⵏⴰⴹⵉⵏ ⵏ ⵢⵉⵍⴻⵍ ⴷ ⵢⵉⵔⵉ ⵏ ⵢⵉⵍⴻⵍ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵡⴻⵒⵕⵓⴼⵉⵙⵓⵔ ⴱⵧⵓⵜⵉⴱⴰ.
ⴰⴷ ⴷ-ⵇⴻⴷⴷⵎⴻⵏ ⵢⴻⵎⵜⵜⴻⴽⴽⵉⵢⴻⵏ ⵉⴳⵎⴰⴹ ⵏ ⵢⵉⵏⴰⴷⵉⵢⴻⵏ-ⵏⵙⴻⵏ ⵓⵙⵙⵏⴰⵏⴻⵏ ⴷ ⵢⵉⵖⴰⵡⴰⵙⴻⵏ-ⵏⵙⴻⵏ (ⵎⵓⵅⴰⵟⵟⴰⵟⴰⵜ) ⵏ ⵜⵉⴳⴰⵡⵜ ⵉ ⵍⵎⴻⵏⴷ ⵏ « ⵡⴻⵃⵔⴰⵣ ⴰⵎⴻⵍⵍⵉⵍ (ⴼⴰⵄⵄⴰⵍ) ⵏ ⵜⵡⴻⵏⵏⴰⴹⵉⵏ ⴷ ⵍⴻⵚⵏⴰⴼ ⵉⵎⵓⴷⴷⵉⵔⴻⵏ ⴰⵢ ⵉⵣⴻⵎⵔⴻⵏ ⴰⴷ ⵏⴻⴳⵔⴻⵏ, ⵢⴻⵔⵏⵓ ⴰⴷ ⴷ-ⵢⵉⵍⵉ ⵡⴰⵢⴰ ⵉ ⵡⴻⴹⵎⴰⵏ ⵏ ⵢⵉⵎⴰⵍ ⵢⴻⵍⵀⴰⵏ ⵉ ⵢⵉⵎⴻⵣⴷⴰⵖⴻⵏ ⵏ ⵜⵎⵓⵔⴰ ⵏ ⵡⴻⴳⵔⴰⴽⴰⵍ ⴷ ⵓⵎⴰⴹⴰⵍ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵔⵏⴰ ⵡⴻⵒⵕⵓⴼⵉⵙⵓⵔ ⴱⵧⵓⵜⵉⴱⴰ.
