Asebter amenzawi

Qrib ad d-yaweḍ wesleɣmay Bouali ɣer CR Belouizdad

LEZZAYER TAMANEɣT– Yenna-d uselway n CR Belouizdad, Reda Malek, dakken ur yettɛeḍḍil ad d-yuɣal wesleɣmay (mudarrib) Foued Bouali ɣef teɣlamt-a, d acu kan, deg wayen yerzan aɛessas n yeswi agraɣlan, Azzedine Doukha, werɛad ur d-yelli wemsefham yid-s seg yidis n tedrimt.

« Aql-aɣ deg unermis yuẓan mliḥ d Bouali. Nefra-tt, s umata, deg wakk timsal akken ad yebdu asleɣmu n teɣlamt-nneɣ », ɣef wakken ay d-yenna Malek deg yiwen n usarag n tɣemsa ay d-yellan ass n laṛebɛa tameddit deg Lezzayer Tamaneɣt.

Bouali, ay yesleɣman MC Wehṛan 3 kan n wayyuren, yesleɣma yagi CR Belouizdad deg 2012. Tikkelt-a, Bouali ad d-yexlef asleɣmay afṛensis Alain Michel umi ur yettwaɛawed leɛqed.

Seg yidis n yimariren, tessadef-d teɣlamt-a amenṭag (muhaǧim) Sid Ali Lakroum (n WA Bufarik) d wemḥaddi Kamel Zeghli (JSM Bgayet), maca werɛad ur yemsefham Malek d uɛessas n yeswi agraɣlan Azzedine Doukha umi ifuk leɛqed d Yilemẓiyen Inaddalen n Leqbayel.

« Yella-d lxilaf deg temsalt n tedrimt yernu ɣef waya ay yettwawexxer westenyi n leɛqed n Doukha. Ssarameɣ ad geɣ yid-s leɛqed war leɛḍil », ɣef wakken ay d-yenna Malek ay yesɛan assirem d ameqran deg Doukha yernu yebɣa-t ad d-yexlef aɛessas agraɣlan Malik Asselah ay yeddan ad yurar ɣer Yilemẓiyen Inaddalen n Leqbayel.