Asebter amenzawi

Teqbel Surya assiweḍ n lemɛawna ɣer 3 n temdinin timaynutin

NEW YORK (Tuddsa n Yeɣlanen Yeddukklen)– Yeqbel unabaḍ (ḥukuma) asuri ad ssiwḍen Yeɣlanen Yeddukklen lemɛawna s webrid ɣer 3 n temdinin yettwassutlen, ɣef wakken ay d-yenna ass n laṛebɛa umutlay (naṭiq) n Tuddsa n Yeɣlanen Yeddukklen, Stéphane Dujarric.

Timdinin-a d Daraya, Douma d Mouadamieh yernu usant-d tama n Dimecq, ɣef wakken ay d-yenna.

Tessuter Tuddsa n Yeɣlanen Yeddukklen, seg melmi kan, ttesriḥ i ussiweḍ n lemɛawna deg wayyur n Yunyu ɣer 17 n temdinin umi d-ssemḥallqen yiɣallen isuriyen, yernu yeqbel unabaḍ asuri, naqal, ad yefk ttesriḥ i wefraq n lemɛawna ɣef 11 seg temdinin-a.

Imir-a, Tuddsa n Yeɣlanen Yeddukklen tesɛa ttesriḥ ad tessiweḍ lemɛawna ɣer 15 seg 17-nni n temdinin yettwassutlen, maca « mazal ad tkemmel ad tessutur ttesriḥ » i ussiweḍ n lemɛawna s webrid, ɣef wakken ay d-yenna umutlay-a.

Seg gar 17-nni n temdinin ay ssutren Yeɣlanen Yeddukklen, qqiment-d ala snat umi ur d-yefki ttesriḥ unabaḍ asuri akken ad asent-ssiwḍen lemɛawna, yernu ti d tamdint n Al-Waer (d agmam n temdint n Homs, deg tlemmast n Surya) d temdint n Zabadani yellan deg temnaḍt n Dimecq.

Ma d aberru n lemɛawna seg yigenni, yettɣimi-d waya d tifrt ma yella ikemmel wergal n yebriden, « maca yessefk ad aɣ-d-yettunefk ttesriḥ » sɣur unabaḍ asuri, ɣef wakken ay d-yenna Dujarric. « Iswi netta d assiweḍ n wanect akk umi nezmer n lemɛawna s webrid », ɣef wakken ay d-yenna.