Asebter amenzawi

Uraren Ulimpiyen n 2016 – Tacirḍart: Boudjenah d Ait Athmane ad gen tannant deg Tgejda

LEZZAYER TAMANEɣT – Sin n yimariren idzayriyen, Baghdad Boudjenah (Al-Sadd/Qaṭar) d Rachid Ait Athmane (Gijon/Spenyul) umi d-ɣran akken ad sjehden taɣlamt tulimpit tadzayrit n tcirḍart (ddaw 23 n yiseggasen) yernu ad ttekkin deg tannant (tarabbuṣ) ay yebdan ass n lexmis deg Tgejda (Tubiret, 100 n yikilumitren deg wegmuḍ n Ldzayer Tamaneɣt) akken ad d-swejden taɣlamt-a i Wuraren Ulimpiyen n 2016 ad d-yilin deg Rio de Janeiro (Brizil), ɣef wakken ay d-tenna Tfidiṛalit tadzayrit n waddal-a.

S Boudjenah (d amenṭag uẓwir) d Ait Athmane (d alemmas n wenrar amḥaddi), yewweḍ wemḍan n yimariren ay d-yettwafernen i tannant-a n 21 n wussan ɣer 26.

Menɣir sin-a n yimariren, yeɣra-d daɣ wesleɣmay aɣelnaw, Aswisi Pierre-Andre Schürmann i yimariren imaynuten niḍen am Haris Belkabla (FC Tours, Fṛansa), Abdelghani Demmou (MC Ldzayer), Sofiane Bendebka (NA Ḥusin Day), Hamar Ziri d Merbah Messala (JS Ṣṣawra).

Uqbel ma ddan ɣer Tgejda, gan yimariren-a, deg tezwara n dduṛt, ikayaden ifekkanen d yesnajyanen (ṭibbiyya) deg Wammas Atwilant n Sidi Musa.

Ad gen daɣ Yizegzawen tannant niḍen deg Ldzayer Tamaneɣt gar 13 d 17 Yulyu, d tallit aydeg ad uraren timlilit tammidwant d teɣlamt tulimpit n tcirḍart n Ɛiraq.