Asebter amenzawi

Ɛin Ddefla: terna lɣella n tkerrazt s 3 n tikkal deg 15 n yiseggasen

ƐIN DDEFLA – Terna lɣella n tkerrazt s wugar n 3 n tikkal deg 15 n yiseggasen-a ineggura deg twilayt n Ɛin Ddefla, imi, deffir ma tefka-d twilayt-a 4,8 n yimelyunen n yiqenṭaren n lɣella deg 1999-2000, tefka-d aseggas yezrin 18 n yimelyunen n yiqenṭaren, ɣef wakken ay aɣ-d-tenna ass n ssebt tmehla (mudiriyya) n yimeẓla n tkerrazt n twilayt-a.

S waya, yerna ufares (intaǧ) n tfellaḥt s wugar n 380%, ɣef wakken ay d-yenna yemkellef s taddadanin (iḥṣa’iyyat) n tmehla-a, Amar Saadi, am wakken ay d-yenna dakken arid (tanabbu’) n 2018-2019 yessefray afares n wugar n 20 n yimelyunen n yiqenṭaren.

Timerniwt n ufares deg twilayt-a terza ladɣa tidal (xuḍar), yernu tewweḍ tjumma (misaḥa) n wesfulleḥ n tidat ɣer 36000 n yiqeṭṭaren (terna s wugar n 3 n tikkal) deg tallit-a, ɣef wakken ay d-yenna Mass Saadi, am wakken ay d-yerna dakken assemɣer n wakal yettwasswen d usseqdec n tmacinin n tkerrazt ttekkan s waṭas deg usserbeḥ n wesfulleḥ n tidal.

Timerniwt-a terna tḥuza-d daɣ azal n ufares ay yernan seg 12,8 n yimelyaṛen n yidinaṛen (1999-2000) ɣer 127 n yimelyaṛen n yidinaṛen deg 2015, ɣef wakken ay d-yenna Mass Saad, ay d-yernan dakken afmiḍi (nisba) n unnerni n tkerrazt ad yaweḍ ɣer 30% deg tgara n useggas ankerraz n 2018-2019.

Tella-d daɣ tmerniwt deg ufares n yikesman izewwaɣen, imi, deg gar 2000 d 2004, talemmast n ufares tella 50,48 n yiqenṭaren, deg tallit gar 2010 d 2014, yewweḍ ufares n yikesman izewwaɣen ɣer 188 000 n yiqenṭaren.