Asebter amenzawi

Anadi ɣef leswaq imaynuten i ussenzi n ufusfaṭ (aneɣlaf)

TBESSA – Yenna-d uneɣlaf n temguri d lminat, Abdeslam Bouchouareb, ass n lḥedd, deg yiwet n terzi ɣef usuddis n lminat n Ǧbel Ɛunq (100 n yikilumitren deg wenẓul n Tbessa) dakken yessefk ad d-yili unadi ɣef leswaq igraɣlanen imaynuten i ussenzi n ufusfaṭ.

Adaf ɣer leswaq imaynuten « ad yessejhed amedxul n yedrimen ijehden », ɣef wakken ay d-yenna uneɣlaf ay iḍefren, deg terzi-a, aqeddem ɣef lmina-a ay yesɛan 11.000 n yiqeṭṭaren yebḍan ɣef 4 n yideggen, maca ala yiwen ay yettwaɣellten.

Seg-a ɣer 2020, asuddis-a ay yessexdamen 1.400 n yixeddamen, ad yernu afares-nnes (intaǧ) ɣer 8 n yimelyunen n yiṭunen i useggas, yili ass-a, la d-yessuffuɣ kan 2 n yimelyunen n yiṭunen, yernu ad tettwawehhay lɛula-a ɣer yisuddisen n ufusfaṭ n Leɛwinat (Tbessa), Wad Kbirat (Suq Ahṛas) d Ḥǧeṛ Ssud (Skikda).

Iɛawed iwekked-d uneɣlaf dakken awanak (dawla) yettɛawan isseftiyen ay d-yessidifen idrimen yernu snulfuyen-d axeddim. Ma d imawlan n yikamyunen ay izedɣen deg temnaḍt-a yernu ssawaḍen afusfaṭ ɣer yisugan (mawan’i), yekkes-asen uneɣlaf aɣbel yernu yenna-asen dakken mazal ad kemmlen axeddim-nsen deg wenrar-a.

La d-ttilint tezrawin i uɣellet n lmina n Bled El Hedba ay yesɛan tajumma n 2.200 n yiqeṭṭaren deg tɣiwant n Bir Lɛater, ɣef wakken ay d-yenna Mass Bouchouareb, yernu iwekked-d dakken ad tebdu lmina-a axeddim deg « tgara n 2017 » s tezmert n 6 n yimelyunen n yiṭunen d 1000 n yixeddamen. Asmi ad tebdu lmina-a axeddim, ad tuɣal Lezzayer tekfa-d iman-nnes s ufusfaṭ yernu ad yernu umedxul-nnes seg ussenzi n lɣella-a.