Asebter amenzawi

Abṭal n wemtawa n tkerrazt gar Tuṛuft d Meṛṛuk: yessefk ad d-iḥettem Ccṛeɛ n Tuṛuft iman-nnes

LEZZAYER TAMANEɣT – Yenna-d uneɣlaf n tɣawsiwin n wezɣar n Tegduda Taɛṛabt Taṣeḥrawit Tamegdayt, Mohamed Salem Ould Salek, ass n lḥedd, dakken tadwilt tamezwarut n truẓu n ccṛeɛ ay d-yessuffeɣ Wexxam n Ccṛeɛ Uṛufi ɣef webṭal n wemtawa n tkerrazt gar Tdukli Tuṛufit d Meṛṛuk ad d-yili ass n 19 Yulyu, yernu yenna-d dakken Axxam n Ccṛeɛ Uṛufi yegguni-t ccɣel iweɛṛen aydeg ay yessefk ad d-iḥettem ṛṛay-nnes.

Deg yiwen n usarag n tɣemsa ay d-yellan ass n lḥedd deg Lezzayer Tamaneɣt deg tmahelt (safara) n Uneẓruf Utrim deg Ldzayer Tamaneɣt, yenna-d Mass Ould Salek dakken deffir ma yeffeɣ-d ccṛeɛ-a ay yesbeṭlen assenzi n yifarisen (mantuǧat) n tkerrazt d ṣṣyada n yiselman gar Tdukli Tuṛufit d Meṛṛuk, « tḥuṛef Meṛṛuk d kra n tmura n Tuṛuft, gar-asent Fṛansa, akken ad ḥeṛsent Axxam n Ccṛeɛ Uṛufi akken ad yuɣal deg wawal-nnes deg wayen yerzan abṭal-a ».

Deg wayen yerzan tiɣimit n truẓi n ccṛeɛ, yenna-d umasay-a (mas’ul) aṣeḥrawi dakken « tiɣimit tamezwarut ad d-tili ass n 19 Yulyu ay d-yetteddun yernu ad d-tili i wesfukel », yernu, ɣef leḥsab-nnes, taruẓi-a n ccṛeɛ teqqen ɣer tsertit, maci ɣer lqanun.

Yenna-d daɣ dakken yella ccek dakken Fṛansa teḥṛes timura tuṛufiyin niḍen, gar-asent Spenyul, Puṛtugal, Biljik d Lalman akken ad tent-tesseqneɛ ad rẓent ccṛeɛ n Wexxam n Ccṛeɛ Uṛufi.

S waya, Axxam n Ccṛeɛ Uṛufi yettmagar ugur d aweɛṛan, d win aydeg ay yessefk ad d-yessken dakken yesɛa azarug (istiqlal), ɣef wakken ay d-iwekked.